پی سی بی کا بنگلہ دیش کرکٹ بورڈ کو بڑی پیشکش

06, اگست , 2024

نیوز ٹوڈے : پاکستان کرکٹ بورڈ (پی سی بی) نے بنگلہ دیش میں بگڑتی ہوئی صورتحال کے پیش نظر بنگلہ دیش کرکٹ بورڈ کو اہم پیشکش کر دی۔

ذرائع کے مطابق پی سی بی نے بنگلہ دیش کرکٹ بورڈ کے حکام کو پیشکش کی ہے کہ بنگلہ دیش کے حالات خراب ہیں بنگلہ دیش کی قومی ٹیسٹ ٹیم کو وقت سے پہلے پاکستان بھیج دیا جائے۔ ذرائع کا کہنا ہے کہ بنگلہ دیش کرکٹ بورڈ نے پی سی بی کی پیشکش پر خاموشی اختیار کر رکھی ہے اور تاحال کوئی جواب نہیں دیا۔

پی سی بی حکام کا موقف ہے کہ پاکستان میں امن و امان کی صورتحال بہترین ہے، آپ اپنی ٹیم کو وقت سے پہلے پاکستان بھیج سکتے ہیں، بنگلہ دیشی ٹیم یہاں آزادانہ تربیت اور پریکٹس کر سکتی ہے۔ یاد رہے کہ پاکستان اور بنگلہ دیش کے درمیان پہلا ٹیسٹ میچ 21 اگست سے راولپنڈی میں شیڈول ہے۔ دوسری جانب بنگلہ دیش کی اے ٹیم 48 گھنٹے تاخیر سے پاکستان پہنچے گی۔ پی سی بی کے مطابق پی سی بی اور بی سی بی گزشتہ دو روز سے رابطے میں ہیں۔ پاکستان شاہینز اور بنگلہ دیش اے کے درمیان 2 چار روزہ اور 3 ایک روزہ میچز شیڈول ہیں۔