کیا ارشد ندیم کے لیے اعلان کردہ انعامی رقم پر ٹیکس عائد ہوگا یا نہیں؟

نیوز ٹوڈے :   فیڈرل بورڈ آف ریونیو (ایف بی آر) نے پیرس اولمپکس کے گولڈ میڈل جیتنے والے ارشد ندیم کی انعامی رقم پر ٹیکس لگانے کی خبروں کی تردید کردی۔

اس حوالے سے اطلاعات تھیں کہ ارشد ندیم واپڈا کے گریڈ 18 کے ملازم ہیں اور انکم ٹیکس فائلر ہیں، انکم ٹیکس ایکٹ کے سیکشن 156 کے تحت 20 فیصد ٹیکس عائد ہوتا ہے۔اطلاعات تھیں کہ ارشد ندیم کے لیے اب تک اعلان کردہ رقم 30 کروڑ روپے ہے اور اس پر 6 کروڑ روپے ٹیکس ہے۔

تاہم اب فیڈرل بورڈ آف ریونیو (ایف بی آر) نے ارشد ندیم پر ٹیکس لگانے کی تردید کی ہے۔ ترجمان بختیار محمد نے کہا کہ ارشد ندیم کو ملنے والی انعامی رقم پر کوئی ٹیکس نہیں لیا جائے گا، ارشد ندیم کو ملنے والی انعامی رقم پر انکم ٹیکس یا ود ہولڈنگ ٹیکس لاگو نہیں ہوگا۔

انہوں نے کہا کہ انکم ٹیکس قوانین میں اولمپک گیمز میں حاصل ہونے والی انعامی رقم پر ٹیکس کا کوئی ذکر نہیں، ارشد ندیم قومی ہیرو ہیں ان سے ہر ممکن تعاون کیا جائے گا۔واضح رہے کہ ارشد ندیم نے مردوں کے جیولن تھرو ایونٹ کے فائنل میں 40 سال بعد پاکستان کے لیے گولڈ میڈل جیتا۔ وہ اولمپکس میں انفرادی مقابلے میں گولڈ میڈل جیتنے والے پاکستان کے پہلے ایتھلیٹ ہیں۔