صحافی کے سوال پر ارشد ندیم کا دلچسپ جواب، 'آپ بھی سیاست میں آئیں گے؟

نیوز ٹوڈے :    پیرس اولمپکس میں گولڈ میڈل جیتنے والے قومی ہیرو ارشد ندیم کا لاہور پہنچنے پر پرتپاک استقبال کیا گیا۔ارشد ندیم کی فلائٹ دوپہر 1 بجکر 25 منٹ پر لاہور پہنچی، اس موقع پر ان کے طیارے کا واٹر کینن کی سلامی دے کر استقبال کیا گیا۔

لاہور ایئرپورٹ پر ہزاروں شائقین  ارشد ندیم کی جھلک دیکھنے پہنچے، بینڈ نے گانے بجا کر ماحول میں مزید جوش پیدا کیا۔ لوگوں نے ڈھول کی تھاپ پر تالیاں بجائیں اور پھولوں کی پتیاں نچھاور کیں، خوشی میں جھومتے شائقین نے سیلفیاں بھی لیں۔

ارشد ندیم نے وطن واپسی پر میڈیا سے گفتگو کرتے ہوئے کہا کہ قوم اور والدین کی دعاؤں سے اللہ نے عزت دی، اس کامیابی کے پیچھے ایک طویل سفر ہے، میڈل حاصل کرنے کے لیے دن رات محنت کی۔اس موقع پر صحافی نے ارشد ندیم سے سوال کیا کہ کیا وہ سیاست میں آئیں گے؟صحافی کے سوال کا جواب دیتے ہوئے ارشدندیم نے کہا کہ جو کرنا ہے کروں گا، میں سیاست میں نہیں آنا چاہتا۔

واضح رہے کہ ارشد ندیم اولمپک ریکارڈ کے ساتھ جیولن تھرو مقابلے میں گولڈ میڈل جیت چکے ہیں۔ انہوں نے 92.97 میٹر پھینک کر نیا اولمپک ریکارڈ قائم کیا۔مردوں کے جیولن تھرو ایونٹ کے فائنل میں ارشد ندیم نے 40 سال بعد پاکستان کے لیے گولڈ میڈل جیتا۔ارشد ندیم پاکستان کے پہلے ایتھلیٹ ہیں جنہوں نے اولمپکس میں انفرادی مقابلے میں گولڈ میڈل جیتا ہے۔