معروف موٹر کمپنی نے ارشد ندیم کو مہنگی ترین گاڑی تحفے میں دینے کا اعلان کر دیا

نیوز ٹوڈے :   پیرس اولمپکس 2024 میں 118 سال پرانا ریکارڈ توڑ کر گولڈ میڈل جیتنے والے قومی ہیرو ارشد ندیم کے لیے وفاقی اور صوبائی حکومتوں، شخصیات اور کمپنیوں کی جانب سے درجنوں انعامات کا اعلان کیا گیا ہے۔

ٹویوٹا موٹرز بھی ارشد ندیم کے لیے انعامات کا اعلان کرنے والی کمپنیوں میں شامل ہو گئی ہے، جس نے انھیں اپنی ٹویوٹا کرولا کراس ہائبرڈ الیکٹرک کار تحفے میں دینے کا اعلان کیا ہے۔ رپورٹ کے مطابق صدر آصف علی زرداری نے ارشد ندیم کو ہلال امتیاز (سول) دینے کا اعلان کیا ہے۔ پنجاب حکومت کی جانب سے 10 کروڑ اور سندھ حکومت کی جانب سے 5 کروڑ کے انعام کا اعلان کیا گیا ہے۔

اعلان کیا گیا ہے کہ اے آر وائی انہیں ایک لگژری فلیٹ اور نجی بینک یو بی ایل سے 50 لاکھ روپے نقد دے گا۔ کراچی الیکٹرک کی جانب سے ارشد ندیم کے لیے 20 لاکھ روپے، کرکٹر احمد شہزاد کی جانب سے 10 لاکھ روپے، پاکستانی نژاد امریکی بزنس مین اور سماجی شخصیت علی شیخانی نے انہیں آلٹو کار تحفے میں دینے کا اعلان کیا ہے۔

گورنر پنجاب سردار سلیم حیدر خان ارشد ندیم کو 20 لاکھ روپے دیں گے جبکہ سکھر کے میئر انہیں سونے کا تاج پہنائیں گے اور ایک سٹیڈیم ان کے نام سے منسوب کیا جائے گا۔ معروف گلوکار علی ظفر نے بھی انہیں 10 لاکھ روپے انعام دینے کا اعلان کیا ہے۔ چیئرمین ایتھلیٹکس فیڈریشن آف پاکستان نے اعلان کیا ہے کہ قومی ہیرو اپنے اہل خانہ کے ہمراہ عمرہ ادا کریں گے اور پاکستان گیس اینڈ آئل کمپنی انہیں زندگی بھر مفت پیٹرول دے گی۔ ارشد ندیم کے سسر محمد نواز نے بھی انہیں ایک بھینس بطور تحفہ دینے کا اعلان کیا ہے۔