ایپل کے نئے آئی فونز کب متعارف کرائے جائیں گے؟ تاریخ سامنے آگئی

نیوز ٹوڈے :    ویسے تو بہت سی کمپنیاں اسمارٹ فون تیار کرتی ہیں لیکن ایپل کے آئی فونز کو سب سے خاص سمجھا جاتا ہے۔یہی وجہ ہے کہ دنیا بھر کے لوگ ہر سال نئے آئی فونز کا بے صبری سے انتظار کرتے ہیں۔آئی فون 16 سیریز اس سال متعارف کرائی جائے گی اور اب اس کی ممکنہ لانچ کی تاریخ سامنے آگئی ہے۔

بلومبرگ کی رپورٹ کے مطابق ایپل کے نئے آئی فونز کی نقاب کشائی 10 ستمبر کو ایک تقریب کے دوران کی جائے گی۔ایپل عام طور پر ستمبر کے دوسرے منگل یا بدھ کو نئے آئی فونز کی نقاب کشائی کرتا ہے اور اس سال بھی ایسا ہی ہوگا۔

رپورٹ کے مطابق ایپل واچ سیریز 10، ایپل واچ ایس ای اور ایپل واچ الٹرا 3 کے ساتھ ایونٹ میں آئی فون 16، آئی فون 16 پلس، آئی فون 16 پرو اور آئی فون 16 پرو میکس جیسی ڈیوائسز بھی متعارف کرائی جائیں گی۔اگر نئے آئی فونز واقعی 10 ستمبر کو متعارف کرائے جاتے ہیں تو مختلف ممالک کے صارفین انہیں 20 ستمبر کو خرید سکیں گے۔

لیکس کے مطابق آئی فون 16 کے بیک پر کیمرے سیٹ اپ کے ڈیزائن میں تبدیلی کی جائے گی جبکہ یہ 6.1 انچ ڈسپلے سے لیس ہوگا۔آئی فون 16 پلس میں 6.7 انچ ڈسپلے ہوگا، جب کہ آئی فون 16 پرو میں 6.3 انچ ڈسپلے ہوگا، جب کہ آئی فون 16 پرو میکس میں 6.9 انچ ڈسپلے ہوگا۔

یہ بھی کہا جا رہا ہے کہ آئی فون 16 پرو میکس کے فرنٹ ڈسپلے میں فی الحال دستیاب کسی بھی اسمارٹ فون کے سب سے چھوٹے بیزلز ہوں گے۔ایک لیک نے تجویز کیا کہ آئی فون 16 پرو میکس کا بیزل سائز 0.06 انچ سے کم ہوگا۔