چاہت فتح علی خان نے انگریزی گانوں کی دنیا میں بھی قدم رکھ دیا

نیوز ٹوڈے :   اپنی مزاحیہ گائیکی سے سوشل میڈیا پر شہرت حاصل کرنے والے برطانوی پاکستانی گلوکار چاہت فتح علی خان نے اب انگریزی گانوں کی دنیا میں قدم رکھ دیا ہے۔چاہت فتح علی خان جن کا اصل نام کاشف رانا ہے، اپنے منفرد انداز گائیکی کی وجہ سے اکثر میڈیا کی توجہ کا مرکز رہتے ہیں۔2022 میں، کاشف رانا سوشل میڈیا پر 'چاہت فتح علی خان' کے نام سے وائرل ہوئے، ان کے ایک تفریحی گانے کی ویڈیو نے سوشل میڈیا پر لاکھوں فالوورز کو اپنی طرف متوجہ کیا۔

گزشتہ سال انہوں نے پاکستان سپر لیگ کے لیے ایک گانا بھی گایا تھا۔اس سال بھی، چاہت فتح علی خان نے ماضی کے مقبول گانے 'اکھ ہلدی بڑی بڑی' کا ریمیک بنایا جسے یوٹیوب پر فوری طور پر 28 ملین ویوز ملے۔

اس گانے کو نہ صرف پاکستانی سوشل میڈیا صارفین اپنی ریلز (شارٹ ویڈیوز) پر لگا رہے تھے بلکہ بھارتی صارفین سمیت کچھ بھارتی اداکاروں نے بھی اس پر ویڈیو بنائی تھی۔ یہ وائرل گانا بدو بدی کاپی رائٹ کی وجہ سے یوٹیوب سے ڈیلیٹ کر دیا گیا تھا۔ تاہم چاہت فتح علی خان نے اب انگریزی گانوں کی دنیا میں قدم رکھ کر اپنے انگلش مداحوں کو خوش کر دیا ہے۔

سوشل میڈیا پر ایک ویڈیو وائرل ہو رہی ہے جس میں چاہت فتح علی خان ایک انگریز کے ساتھ ہوٹل میں بیٹھے ہیں جہاں پاکستانیوں سمیت کچھ اور لوگ بھی موجود ہیں اور وہ چاہت فتح کی ویڈیو بنا رہے ہیں۔ویڈیو میں موجود کچھ لوگوں نے چاہت فتح علی خان سے درخواست کی کہ وہ اپنے ساتھ بیٹھے انگریز کے لیے انگریزی میں ایک گانا گائیں۔

جس پر چاہت فتح علی خان نے بتایا کہ میں ایک انگریزی رومانوی گانا لکھ رہا ہوں جس کی کچھ سطریں میں آپ کو سناؤں گا، انہوں نے پھر گانا گایا جس پر لوگوں نے تالیاں بھی بجائیں۔وہاں موجود لوگوں نے انگریز سے پوچھا کہ کیا آپ چاہت فتح علی خان کے مداح ہیں؟ تو انہوں نے جواب دیا کہ ہاں میں نے انہیں ٹک ٹاک پر دیکھا ہے، میں ان کا بڑا مداح ہوں۔