لبنان کے بعد اسرائیل نے یمن پر بھی حملہ کیا

30, ستمبر , 2024

نیوز ٹوڈے : اسرائیلی فضائیہ نے یمنی شہر حدیدہ پر حملہ کیا ہے۔غیر ملکی خبر رساں ادارے کے مطابق اسرائیلی فوج کی جانب سے جاری بیان میں کہا گیا ہے کہ اسرائیلی فضائیہ نے حدیدہ اور راس عیسیٰ میں بندرگاہ اور پاور پلانٹس کو نشانہ بنایا ہے۔اسرائیلی فوج کے مطابق حملے میں فضائیہ کے درجنوں طیاروں نے حصہ لیا۔غیر ملکی خبر رساں ادارے کے مطابق حملے کے بعد حدیدہ شہر کے بیشتر علاقوں کی بجلی منقطع ہوگئی۔

عرب میڈیا کے مطابق اسرائیلی طیاروں نے تیل ذخیرہ کرنے والی تنصیبات پر حملہ کیا تاہم حوثیوں نے اسرائیلی حملے کے پیش نظر انہیں پہلے ہی خالی کرا لیا تھا۔یمنی وزارت صحت کے مطابق اسرائیلی حملوں میں 4 افراد ہلاک اور 29 زخمی ہوگئے۔

واضح رہے کہ اس سے قبل جولائی میں اسرائیلی دارالحکومت تل ابیب پر حوثی باغیوں کے ڈرون حملے کے جواب میں اسرائیلی فضائیہ نے یمنی شہر حدیدہ پر فضائی حملہ کیا تھا۔یمنی میڈیا کے مطابق اسرائیلی حملوں میں یمنی شہر حدیدہ میں تیل کی تنصیبات کو نشانہ بنایا گیا جس میں 3 افراد ہلاک اور 87 افراد زخمی ہوگئے۔