پاکستان کے نوح بٹ نے کامن ویلتھ پاور لفٹنگ چیمپئن شپ میں 3 گولڈ میڈل جیت لیے

11, اکتوبر , 2024

نیوز ٹوڈے : جنوبی افریقہ میں جاری کامن ویلتھ پاور لفٹنگ چیمپئن شپ میں پاکستان کے نوح بٹ نے شاندار کارکردگی کا مظاہرہ کرتے ہوئے 3 گولڈ اور ایک کانسی کا تمغہ جیت لیا۔نوح بٹ 120 کلوگرام کیٹیگری میں کامن ویلتھ پاور لفٹنگ کے نئے چیمپئن بن گئے۔نوح بٹ نے بینچ پریس اور اسکواٹ میں بھی شاندار کارکردگی کا مظاہرہ کرتے ہوئے 120 کلوگرام اوپن کیٹیگری میں گولڈ میڈل جیتا۔

انہوں نے اسکواٹ کیٹیگری میں 370 کلو گرام وزن اٹھا کر گولڈ میڈل جیتا جبکہ بینچ پریس میں انہوں نے 210 کلوگرام وزن اٹھا کر ایک اور گولڈ میڈل حاصل کیا۔نوح بٹ نے ڈیڈ لفٹ کیٹیگری میں 280 کلوگرام وزن اٹھا کر کانسی کا تمغہ بھی حاصل کیا۔

اوپن کیٹیگری میں نوح بٹ نے کل 860 کلوگرام وزن اٹھا کر ٹائٹل اپنے نام کیا۔نوح بٹ اس سے قبل ویٹ لفٹنگ میں بھی پاکستان کے لیے کئی تمغے جیت چکے ہیں لیکن پاکستان ویٹ لفٹنگ فیڈریشن سے اختلافات کے بعد انہوں نے ویٹ لفٹنگ سے پاور لفٹنگ کی طرف رخ کیا۔