مائیں اپنی بیٹیوں کو صرف گھر ہی نہیں ملک چلانا بھی سکھائیں، خالد مقبول صدیقی

28, اکتوبر , 2024

نیوز ٹوڈے : چیئرمین متحدہ قومی موومنٹ خالد مقبول صدیقی نے کہا ہے کہ مائیں اپنی بیٹیوں کو نہ صرف یہ سکھائیں کہ نشتر کیسے پکڑا جاتا ہے بلکہ گھر کیسے چلانا ہے اور ملک کیسے چلانا ہے۔

سرجانی ٹاؤن میں متحدہ قومی موومنٹ کی تقریب سے خطاب کرتے ہوئے خالد مقبول نے کہا کہ کراچی اور حیدرآباد کے نوجوانوں نے بتا دیا ہے کہ وہ سب اس تنظیم کے ساتھ کھڑے ہیں جس نے سیاست کا ایسا انداز دیا جس نے ایوانوں کو ہلا کر رکھ دیا۔انہوں نے کہا کہ نوجوان تیار رہیں، جلد کراچی، حیدرآباد، میرپورخاص میں دنیا کی مشہور یونیورسٹیوں کے کیمپس کھلنے جارہے ہیں۔

تقریب سے خطاب کرتے ہوئے فاروق ستار نے کہا کہ ایم کیو ایم بہت جلد اس شہر کو نوجوانوں کی تازہ قیادت دینے جا رہی ہے، وقت آگیا ہے کہ ایک بار پھر نوجوانوں کو بلدیاتی کونسل، صوبائی اور قومی اسمبلی میں بھیجا جائے۔

فاروق ستار نے کہا کہ کراچی کی اگلی میئر لڑکی ہوسکتی ہے، سیاسی اختلافات کو ایک طرف رکھ کر شہر کی تعمیر و ترقی کے لیے مل بیٹھنا ہوگا۔