مونال کے مقام کا نیا نام کیا ہوگا؟ اعلان کیا گیا

نیوز ٹوڈے :  اسلام آباد میں مونال ریسٹورنٹ کا مقام مارگلہ ویو پوائنٹس رکھا گیا۔اسلام آباد وائلڈ لائف مینجمنٹ بورڈ کی سربراہ رائنا سعید نے پریس کانفرنس کرتے ہوئے کہا کہ اب مونال کی جگہ کو ’ مارگلہ ویو پوائنٹ‘ کا نام دیا گیا ہے۔ سپریم کورٹ کے حکم پر یہاں قائم دو ہوٹلوں کو گرا دیا گیا ہے۔ یہاں جو دو ہوٹل قائم ہوئے تھے وہ غلط تھے۔ رائنا سعید نے کہا کہ یہاں جنگلی حیات کی بہتات ہے۔ اس جگہ پر عوامی تفریح ​​کے لیے پارک ہوگا۔ جنگلی حیات کا علاقہ 4 زونز پر مشتمل ہوگا۔ انہوں نے کہا کہ ہماری بورڈ ممبر عمرانہ ٹوانہ منصوبہ بنا رہی ہیں۔ آرکیٹیکچرل ڈیزائن اگلے ماہ تک مکمل ہو جائے گا۔ یہاں پانی ذخیرہ کرنے کا انتظام کیا جائے گا۔ عوامی آگاہی کے لیے عوامی مرکز بنایا جائے گا۔

انہوں نے کہا کہ جنگل میں لگی آگ پر قابو پانے کے لیے فائر فائٹنگ سینٹر ہوگا، سائنسی انتظامی پلان تیار کیا جا رہا ہے۔ یہاں سے کچھ فاصلے پر خیبر پختونخوا شروع ہوتا ہے۔ کے پی سے پہلے بفر زون بھی قائم کیا جائے گا۔ بورڈ ممبر عمرانہ ٹوانہ نے کہا کہ نیشنل پارک عوام کی امانت ہے، دارالحکومت میں وائلڈ لائف پارک ہے۔ انہوں نے کہا کہ وہ ماحولیات کی بہتری کے لیے ایکو ماڈل تشکیل دے رہے ہیں۔ موسمیاتی تبدیلیوں کی وجہ سے برے اثرات ہو رہے ہیں۔ ہم پوری دنیا کے لیے ایک اچھی مثال بننا چاہتے ہیں۔