عافیہ صدیقی کی رہائی کی درخواست پر اہم پیش رفت

نیوز ٹودے :     امریکا میں قید پاکستانی ڈاکٹر عافیہ صدیقی کی بازیابی اور رہائی کے حوالے سے ڈاکٹر فوزیہ صدیقی کی درخواست پر اہم پیش رفت ہوئی ہے۔

اسلام آباد ہائی کورٹ کے جسٹس سردار اعجاز اسحاق خان نے عافیہ صدیقی کی رہائی سے متعلق کیس کی سماعت کی۔ ایڈیشنل اٹارنی جنرل اور وزارت خارجہ کا نمائندہ عدالت میں پیش ہوا۔ڈاکٹر فوزیہ صدیقی کے وکیل عمران شفیق اور جوڈیشل اسسٹنٹ زینب جنجوعہ بھی عدالت میں پیش ہوئے۔

ایڈیشنل اٹارنی جنرل منور اقبال ڈوگل نے اسلام آباد ہائی کورٹ کو بتایا کہ وزیر اعظم شہباز شریف نے عافیہ صدیقی کیس میں امریکا جانے والے وفد کی مالی معاونت کی سمری پر دستخط کر دیے ہیں۔ وزارت خارجہ کے نمائندے کا اس حوالے سے کہنا ہے کہ وفد کی ویزا درخواست وزارت خارجہ کی جانب سے بھجوائی گئی ہے، امید ہے کہ ایک ہفتے میں اسے منظور کر لیا جائے گا۔

وزارت خارجہ کے نمائندے کا کہنا ہے کہ ہم ڈاکٹر فوزیہ صدیقی کو ہر ممکن مدد فراہم کر رہے ہیں۔ایڈیشنل اٹارنی جنرل نے عدالت کو بتایا کہ سینیٹر عرفان صدیقی ذاتی وجوہات کی بنا پر وفد کے ساتھ نہیں جا سکے، سینیٹر بشریٰ حکومت کی جانب سے وفد کے ساتھ امریکا جائیں گی۔

اسلام آباد ہائی کورٹ نے ڈاکٹر عافیہ صدیقی سے متعلق کیس کی سماعت 13 جنوری تک ملتوی کردی۔واضح رہے کہ ڈاکٹر عافیہ صدیقی ایک متنازعہ عدالتی فیصلے کے باعث امریکا میں 86 سال قید کی سزا کاٹ رہی ہیں۔