پی ٹی آئی قیادت کو بشریٰ بی بی کی بہن اور ترجمان کے بیان پر تحفظات ہیں، شیر افضل

نیوز ٹوڈے :    پاکستان تحریک انصاف (پی ٹی آئی) کی پارٹی قیادت نے عمران خان کی اہلیہ بشریٰ بی بی کی بہن مریم ریاض وٹو اور ان کی ترجمان مشال یوسفزئی کے بیان پر تحفظات کا اظہار کیا ہے۔پی ٹی آئی رہنما شیر افضل مروت نے کہا کہ بشریٰ بی بی کی بہن اور ترجمان کی جانب سے آنے والے بیان پر پارٹی قیادت کو شدید تحفظات ہیں۔

پی ٹی آئی میں کچھ لوگوں کے تانے بانے ایجنسیوں کے سابق ایجنٹوں سے ملتے جلتے ہیں جو پارٹی میں تقسیم پیدا کر رہے ہیں۔ جو زبان استعمال کی جا رہی ہے اس سے قیادت میں مایوسی اور بے بسی پھیل رہی ہے، مسلسل طعنے، شکایات اور الزامات عوام کے جذبے کو توڑ رہے ہیں۔

انہوں نے کہا کہ پی ٹی آئی کے بانی ان بیانات پر مداخلت کریں اور یہ باتیں بند کریں، قاسم سوری نے جو باتیں کیں، یہ ان باتوں کا وقت نہیں ہے۔

شیر افضل مروت نے کہا کہ ڈرنے اور گھبرانے کی بجائے ہمیں فوری طور پر ملک بھر میں احتجاج کی کال دے کر دوبارہ اسلام آباد جانا چاہیے تھا۔ واضح رہے کہ سابق وزیراعظم عمران خان کی اہلیہ بشریٰ بی بی کے ترجمان مشال یوسفزئی اور سابق خاتون اول کی بہن مریم ریاض وٹو نے دعویٰ کیا ہے کہ عمران خان کو 'سمجھوتہ کرنے والے' رہنماؤں سے زیادہ بشریٰ بی بی پر اعتماد ہے۔ 

برطانوی اخبار گارجین سے بات کرتے ہوئے بشریٰ بی بی کے معاونین کا کہنا تھا کہ پارٹی رہنما بانی کی ہدایات پر پوری طرح عمل نہیں کرتے جس کی وجہ سے بشریٰ بی بی کو عملی میدان میں آگے لایا گیا۔ آخری کال کے احتجاج کے دن بھی بشریٰ بی بی نے پی ٹی آئی کے بانی کی ہدایت پر اور ان کے مفادات میں کام کیا۔

بشریٰ بی بی کی بہن مریم ریاض وٹو نے الزام لگایا کہ بانی کے قریبی ساتھیوں کا کردار مشکوک ہے، ایسا لگتا ہے کہ دونوں اپنے مفاد کے لیے کھیل رہے ہیں، بشریٰ بی بی کو احتجاج کے دوران مرکز اسلام آباد جانے سے روکنے کے لیے دباؤ ڈالا گیا۔