کراچی: عالمی اردو کانفرنس کے موقع پر 4 روزہ ٹریفک پلان جاری کر دیا گیا

نیوز ٹوڈے :   عالمی اردو کانفرنس آج سے آرٹس کونسل کراچی میں شروع ہورہی ہے، افتتاحی تقریب سے آئندہ 4 روز تک مختلف راستے ٹریفک کے لیے بند رہیں گے، اس موقع پر ٹریفک کے خصوصی انتظامات کیے گئے ہیں۔ٹریفک پولیس کے اعلامیہ کے مطابق ایم آر کیانی چوک تا ایوان صدر روڈ عالمی اردو کانفرنس کی افتتاحی تقریب سے 4 روز تک شام 4 بجے سے رات 9 بجے تک بند رہے گا۔

ٹریفک پولیس کے مطابق سندھ اسمبلی انیوالا روڈ سے کورٹ روڈ سے مسجد اہل حدیث تک بھی بند رہے گی، کمرشل گاڑیوں کو ایوان صدر روڈ پریس کلب چوک سے، دین محمد وفائی روڈ پریس کلب چوک سے آنے کی اجازت نہیں ہوگی۔ 

سرور شہید روڈ پر واقع وائی ایم سی اے میں ہونے والی اردو کانفرنس کے اجلاس میں شرکت کے لیے آنے والوں کے لیے پولو گراؤنڈ کے سامنے، سندھ اسمبلی کے سامنے اور فیضی رحمن لائبریری کے سامنے پارکنگ کا انتظام کیا جائے گا۔

آرٹس کونسل پاکستان کراچی کے زیر اہتمام چار روزہ 17ویں عالمی اردو کانفرنس کا افتتاح جمعرات کو شام 5 بجے YMCA گراؤنڈ میں ہوگا۔افتتاحی تقریب کے مہمان خصوصی وزیر اعلیٰ سندھ سید مراد علی شاہ ہوں گے، آرٹس کونسل کے صدر محمد احمد شاہ خطبہ استقبالیہ دیں گے، جبکہ حمید ہارون کلیدی خطاب کریں گے۔

آرٹس کونسل کے قیام کی 70ویں سالگرہ کے موقع پر تقریب میں کیک بھی کاٹا جائے گا اور ایوارڈز بھی دیئے جائیں گے۔دوسرے سیشن میں "میں کراچی میں ہوں" میں انور مقصود، تابش ہاشمی اور وسیم بادامی کے مذاکرے ہوں گے۔