عمران خان نے 13 دسمبر کو پشاور میں ’عظیم الشان جلسہ‘ کرنے کا اعلان کر دیا

نیوز ٹوڈے :    پاکستان تحریک انصاف (پی ٹی آئی) کے بانی اور سابق وزیراعظم عمران خان نے اسلام آباد میں پارٹی کے حالیہ احتجاج کے ’شہداء کو خراج عقیدت‘ پیش کرنے کے لیے 13 دسمبر کو پشاور میں ’عظیم الشان اجتماع‘ کا اعلان کیا ہے۔

سابق وزیراعظم عمران خان کی جانب سے سماجی رابطے کی ویب سائٹ فیس بک پر جاری بیان میں کہا گیا کہ ملک میں آمریت قائم ہے، ریاستی دہشت گردی کے نتیجے میں نہتے سیاسی کارکنوں پر گولیاں برسائی گئیں اور پرامن سیاسی کارکن شہید ہوئے۔

انہوں نے الزام لگایا کہ ہمارے سینکڑوں کارکن لاپتہ ہیں، سپریم کورٹ اب اس کا نوٹس لے اور اپنا آئینی کردار ادا کرے۔

انہوں نے کہا کہ ہم انسانی حقوق کی سنگین خلاف ورزیوں پر پہلے بھی سپریم کورٹ، لاہور ہائی کورٹ اور اسلام آباد ہائی کورٹ سے رجوع کر چکے ہیں، لیکن عدالتوں کی جانب سے کوئی کارروائی نہیں کی گئی۔ عمران خان نے کہا کہ ہم شہداء کو خراج عقیدت پیش کرنے کے لیے 13 دسمبر کو پشاور میں عظیم الشان جلسہ منعقد کریں گے، جس میں اپوزیشن کی سیاسی جماعتوں کو شرکت کی دعوت دی جائے گی۔

اپنے تازہ پیغام میں پی ٹی آئی کے بانی نے نہ صرف اجتماع کا اعلان کیا بلکہ عمر ایوب خان، علی امین گنڈا پور، صاحبزادہ حامد رضا، سلمان اکرم راجہ اور اسد قیصر پر مشتمل 5 رکنی مذاکراتی ٹیم بھی تشکیل دی۔

ان کا مزید کہنا تھا کہ یہ مذاکراتی ٹیم 2 نکات کے لیے بنائی گئی ہے جس میں زیر سماعت سیاسی قیدیوں کی رہائی اور 9 مئی اور 26 نومبر کے واقعات کی شفاف تحقیقات کے لیے عدالتی کمیشن کا قیام شامل ہے۔عمران خان نے کہا کہ اگر یہ دونوں مطالبات پورے نہ ہونے پر 14 دسمبر سے سول نافرمانی کی تحریک شروع کی جائے گی اور اس تحریک کے نتائج کی ذمہ دار حکومت ہوگی۔

خیال رہے کہ عمران خان کی جانب سے 24 نومبر کو احتجاج کے لیے دی گئی ’حتمی کال‘ کے بعد بشریٰ بی بی اور وزیراعلیٰ پختونخوا علی امین گنڈا پور کی قیادت میں اسلام آباد کے لیے احتجاجی مارچ کیا گیا تھا۔ تاہم 26 نومبر کو مارچ کے شرکاء اور پولیس کے درمیان جھڑپ کے بعد پی ٹی آئی کے کارکن وفاقی دارالحکومت سے ’فرار‘ ہوگئے۔ جس کے بعد علی امین گنڈا پور اور پی ٹی آئی رہنماؤں نے کارکنوں کی ہلاکت کا دعویٰ کیا اور متضاد اعداد و شمار پیش کیے۔

وزیراعلیٰ خیبرپختونخوا علی امین گنڈا پور نے پریس کانفرنس میں سینکڑوں کارکنوں کی اموات کے اعداد و شمار شیئر کیے، لطیف کھوسہ نے 278 کارکنوں کے اعداد و شمار شیئر کیے، سلمان اکرم راجہ نے 20 اور شعیب شاہین نے 08 کارکنوں کے اعداد و شمار شیئر کیے۔ 

تاہم 2 دسمبر 2024 کو چیئرمین پی ٹی آئی بیرسٹر گوہر نے کہا تھا کہ سینکڑوں ہلاکتوں کی باتیں کرنے والوں سے ہم اپنی عدم دلچسپی کا اعلان کرتے ہیں، ہمارے 12 کارکن شہید ہوئے۔