پاکستان کی تاریخ میں پہلی بار کسی ہندو پی ایس پی افسر کو تعینات کیا گیا

نیوز ٹوڈے :    ملکی تاریخ کے پہلے ہندو پی ایس پی افسر راجندر مہیگوار نے فیصل آباد میں تعیناتی کے بعد اپنے فرائض سرانجام دینا شروع کر دیئے ہیں۔فیصل آباد پولیس کے گلبرگ سرکل میں اے ایس پی تعینات ہونے والے نوجوان راجندر مہیگوار کا تعلق سندھ کے پسماندہ ترین ضلع بدین سے ہے۔ راجندر نے سی ایس ایس کے بعد پولیس گروپ جوائن کیا۔

اے ایس پی کے طور پر تعینات ہونے والے راجندر مہیگوار کا کہنا ہے کہ وہ بہت خوش ہیں کہ عوام کی خدمت کا ان کا خواب پورا ہو گیا ہے۔ محکمہ پولیس میں رہ کر ہم عوام کے مسائل حل کر سکتے ہیں جو ہم دوسرے محکموں میں رہ کر نہیں کر سکتے۔ میں نہیں سمجھتا کہ دوسرے محکموں میں رہتے ہوئے ہم کمیونٹی کے لوگوں کے لیے اتنا آن گراؤنڈ کام کر سکتے ہیں۔ دوسری جانب پولیس حکام بھی پنجاب پولیس کے قیام کے بعد پہلی بار فیصل آباد میں ہندو نوجوان کی بطور اے ایس پی تعیناتی کے حوالے سے پر امید ہیں۔

اس سلسلے میں پولیس حکام کا کہنا ہے کہ ‘راجیندر امن و امان برقرار رکھنے کے ساتھ اقلیتوں کے مسائل کو حل کرنے میں مددگار ثابت ہوں گے۔ یہ ہماری خوش قسمتی ہے کہ ہمارے پاس ایک ہندو افسر ہے۔ ان کی شمولیت فیصل آباد میں بہت اچھی ثابت ہوگی۔ اس سے پولیس میں شمولیت کا تصور بڑھے گا۔‘‘

ادھر رحیم یار خان سے اقلیتی برادری سے تعلق رکھنے والی خاتون روپ متی نے بھی سی ایس ایس کے امتحان میں کامیابی حاصل کی ہے۔ روپ متی نے وزارت خارجہ میں کام کرکے پاکستان کا سافٹ امیج دنیا بھر میں اجاگر کرنے کی خواہش کا اظہار کیا ہے۔