سندھ حکومت کا ایک اور بڑا فیصلہ

نیوز ٹوڈے :   سندھ حکومت نے صوبے بھر میں گاڑیوں کی جدید سائنسی فٹنس چیکنگ کو لازمی قرار دینے کا فیصلہ کیا ہے۔تفصیلات کے مطابق سندھ کے سینئر وزیر شرجیل انعام میمن کی زیر صدارت اہم اجلاس ہوا، جس میں سیکریٹری ٹرانسپورٹ اسد ضامن، پیپلز بس سروس کے پروجیکٹ ڈائریکٹر صہیب شفیق اور دیگر نے شرکت کی۔ اجلاس میں سندھ حکومت نے پیپلز بس سروس کے 40 اسٹاپوں کی تعمیر دو ماہ میں مکمل کرنے کا فیصلہ کیا۔ محکمہ ٹرانسپورٹ نے سندھ بھر میں گاڑیوں کی جدید سائنسی فٹنس چیکنگ کو لازمی قرار دینے کا فیصلہ بھی کیا۔

اس موقع پر سندھ کے سینئر وزیر شرجیل انعام میمن کا کہنا تھا کہ پیپلز بس سروس کے 100 اسٹاپز کی تعمیر مکمل ہوچکی ہے، باقی ماندہ اسٹاپوں کا کام بھی جلد از جلد مکمل کیا جائے، باقی 40 بس اسٹاپوں پر کام جاری ہے۔ اسے بھی دو ماہ کے اندر جنوری 2025 تک مکمل کیا جائے۔ سندھ حکومت ٹرانسپورٹ کے نظام کو دنیا سے ہم آہنگ اور جدید بنانے کی خواہاں ہے۔ پیپلز بس سروس کے جدید ترین بس اسٹاپس جدید، موثر اور پائیدار نقل و حرکت کے لیے بہت اہمیت کے حامل ہیں۔ جدید بس اسٹاپ مسافروں کے بیٹھنے کی بہترین جگہ اور موسم سے تحفظ فراہم کریں گے۔