مدارس کی رجسٹریشن وزارت صنعت کو منتقل کرنے کی کوشش مسترد کرتے ہیں، طاہر اشرفی

نیوز ٹوڈے :   پاکستان علماء کونسل کے چیئرمین طاہر اشرفی نے کہا ہے کہ وہ مدارس کی رجسٹریشن وزارت تعلیم سے وزارت صنعت کو منتقل کرنے کی کوشش کو مسترد کرتے ہیں۔

ملک میں مدارس کی رجسٹریشن کے حوالے سے ویڈیو بیان میں علامہ طاہر اشرفی کا کہنا تھا کہ ملک بھر میں مدارس کی رجسٹریشن کا معاملہ زیر بحث ہے۔ 15 بورڈز میں سے 10 سے زائد وزارت تعلیم کے ساتھ رجسٹریشن کے حق میں ہیں جبکہ ملک میں 18 ہزار سے زائد مدارس وزارت تعلیم میں رجسٹرڈ ہیں۔

انہوں نے کہا کہ وہ مدارس کی رجسٹریشن وزارت تعلیم سے وزارت صنعت کو منتقل کرنے کی کوشش کو مسترد کرتے ہیں۔ مدارس کو وزارت صنعت کے تحت رجسٹر کرنا ملک کے قانون اور اتحاد کے منافی ہے۔ مدارس کی آزادی اور نصاب کے معاملے میں کسی قسم کی مداخلت ناقابل قبول ہے۔

علامہ طاہر اشرفی نے کہا کہ مولانا فضل الرحمان الگ قانون سازی کرنا چاہتے ہیں تو حکومت جان لے اور اسے معلوم ہونا چاہیے، ہم تلخی نہیں چاہتے، معاملہ افہام و تفہیم سے حل ہونا چاہیے۔

واضح رہے کہ صدر پاکستان کی جانب سے مدارس کی رجسٹریشن سے متعلق بل پر دستخط نہ کرنے پر جے یو آئی اور حکومت کے درمیان اختلافات پیدا ہوگئے تھے اور مولانا فضل الرحمان اس معاملے پر لانگ مارچ کی دھمکی بھی دے چکے ہیں۔