لاہور سمیت پنجاب کے بیشتر سرکاری ہسپتال مفت ادویات اور ٹیسٹ کی سہولت سے محروم ہیں

نیوز ٹوڈے :    لاہور سمیت پنجاب بھر کے بیشتر سرکاری ہسپتال مفت ادویات اور مفت ٹیسٹ کی سہولت سے محروم ہیں۔ کئی مریض آپریشن اور علاج کے انتظار میں ہسپتالوں میں بے بس ہیں۔

لاہور کے میو ہسپتال، سروسز، جناح، جنرل اور دیگر ہسپتالوں میں مفت علاج کی سہولیات حاصل کرنے آنے والے غریب مریض پھنسے ہوئے ہیں۔ کئی دنوں سے سرکاری اسپتالوں میں بیشتر مفت ادویات دستیاب نہیں ہیں۔ مریضوں کے لواحقین میڈیکل سٹورز سے مہنگی ادویات خریدنے پر مجبور ہیں جبکہ مریض مہنگے اور پرائیویٹ لیبارٹریوں سے ٹیسٹ کروانے پر بھی مجبور ہیں۔

مریضوں اور ان کے لواحقین کا کہنا ہے کہ سرکاری اسپتالوں میں صرف ڈاکٹرز مفت دستیاب ہیں، نہ ادویات دی جارہی ہیں اور نہ ہی ٹیسٹ کیے جارہے ہیں۔ بعض مریضوں کا کہنا تھا کہ اسپتال میں آپریشن کے لیے بے بس لوگ ہیں، کوئی پوچھنے والا نہیں۔

اس حوالے سے میو ہسپتال کے میڈیکل سپرنٹنڈنٹ (ایم ایس) ڈاکٹر فیصل مقصود کا کہنا تھا کہ عدم ادائیگی کے باعث ٹھیکیدار نے ادویات کی سپلائی بند کر دی ہے، ہمیں جو مل رہا ہے اس پر ہمیں شکر گزار ہونا چاہیے۔

پنجاب کے وزیر صحت سلمان رفیق نے کہا کہ ہسپتالوں کا آڈٹ کرایا جا رہا ہے، گنگارام ہسپتال کے آڈٹ میں 140 ملین روپے کا گھپلہ سامنے آیا ہے۔ آڈٹ مکمل ہونے کے بعد فنڈز فراہم کیے جائیں گے۔مریضوں اور ان کے لواحقین کا کہنا ہے کہ حکومت صرف دعوے نہ کرے بلکہ ادویات کے لیے موثر اقدامات کرے تاکہ غریبوں کو سہولیات مل سکیں۔