مذاکرات میں پیش رفت کے باوجود ن لیگ اور پی ٹی آئی کے درمیان اعتماد کا فقدان

نیوز ٹوڈے :   حکمران جماعت پاکستان مسلم لیگ نواز (پی ایم ایل این) اور اپوزیشن جماعت پاکستان تحریک انصاف (پی ٹی آئی) کے درمیان مذاکرات کے معاملے پر اہم پیش رفت کے باوجود دونوں فریقوں کے درمیان اعتماد کا فقدان ہے۔

پاکستان تحریک انصاف کے رہنما سینیٹر طلال چوہدری نے کہا کہ فیض حمید کی چارج شیٹ دیکھ کر پی ٹی آئی گھبرا رہی ہے۔انہوں نے کہا کہ اس گھبراہٹ میں پی ٹی آئی حکومت کو مذاکرات کا وہم دے رہی ہے تاکہ وہ سزاؤں سے بچ سکے اور کسی نہ کسی طرح فیض حمید کے ٹرائل کو متاثر کر سکے۔

طلال چوہدری نے کہا کہ ہمیں ان کی مذاکرات کی پیشکش میں نیک نیتی نظر نہیں آتی۔اسی پروگرام میں گفتگو کرتے ہوئے پی ٹی آئی رہنما علی محمد خان نے کہا کہ مذاکرات کے معاملے پر حکومتی رویہ دیکھ کر حیران ہوں۔

بانی پی ٹی آئی کی پارٹی قیادت سے عدم اطمینان کے سوال پر علی محمد خان نے کہا کہ کل یا پرسوں بیرسٹر گوہر اور سلمان اکرم راجہ بانی پی ٹی آئی سے ملاقات کریں گے۔ علی محمد خان نے کہا کہ اگر بانی پی ٹی آئی کو کوئی تحفظات ہیں تو وہ اس ملاقات میں ان تک پہنچیں گے۔

واضح رہے کہ گزشتہ روز پی ٹی آئی رہنما اسد قیصر اور اسپیکر قومی اسمبلی ایاز صادق کے درمیان ملاقات میں ملکی مفاد میں مل بیٹھ کر اتفاق رائے پیدا کرنے پر بات ہوئی تھی۔ملاقات میں دونوں جانب سے سخت موقف رکھنے والوں کو سمجھانے پر اصرار کیا گیا۔

ذرائع کے مطابق ایاز صادق نے مشورہ دیا کہ آپ اپنی پارٹی کے بارے میں سخت موقف رکھنے والوں کو سمجھائیں، میں اپنی پارٹی کے بارے میں سخت موقف رکھنے والوں کو سمجھاؤں گا، اس پر اسد قیصر نے کہا کہ پارٹی سے مشاورت کروں گا۔

دونوں رہنماؤں نے قوم کے سامنے مذاکراتی عمل کو شفاف طریقے سے آگے بڑھانے پر اتفاق کیا۔