لاہور کو پاکستان کا پہلا جدید سمارٹ سٹی بنایا جائے گا

نیوز ٹوڈے :  چینی ٹیکنالوجی کمپنی کے تعاون سے لاہور کو پاکستان کا پہلا جدید سمارٹ سٹی بنانے کا فیصلہ کیا گیا ہے۔وزیر اعلیٰ پنجاب مریم نواز جو چین کے دورے پر ہیں نے شنگھائی کے ضلع لونگ گانگ میں ایک چینی ٹیکنالوجی کمپنی کا دورہ کیا جہاں ان کا پرتپاک استقبال کیا گیا۔وزیراعلیٰ پنجاب کے دورے کے موقع پر چینی ٹیکنالوجی کمپنی کے تعاون سے لاہور کو پاکستان کا پہلا جدید سمارٹ سٹی بنانے کا فیصلہ کیا گیا۔

وزیراعلیٰ مریم نواز نے چینی ٹیکنالوجی کمپنی کو پاکستان خصوصاً پنجاب میں سرمایہ کاری کی دعوت دی۔ وزیراعلیٰ نے چینی کمپنی کو نواز شریف آئی ٹی سٹی میں دفتر کے قیام میں تعاون کی پیشکش بھی کی۔

مریم نواز نے چینی ٹیکنالوجی کمپنی کو پنجاب میں اسمبلنگ اور مینوفیکچرنگ پلانٹ لگانے میں تعاون کی یقین دہانی کرائی۔ چینی ٹیکنالوجی کمپنی کی پنجاب میں ریٹیل آفس اور بعد از فروخت سروس سینٹر قائم کرنے کی پیشکش مسترد کر دی گئی۔

وزیراعلیٰ نے چینی ٹیکنالوجی کمپنی گورنمنٹ افیئرز کے صدر وانگ چینگ ڈونگ سے ملاقات کی جس میں لاہور کو جدید ڈیجیٹل سٹی بنانے کے لیے مختلف تجاویز اور سفارشات پر غور کیا گیا اور مریم نواز نے وانگ چینگ ڈونگ کو لاہور آنے کی دعوت بھی دی۔

مریم نواز اور وانگ چینگ ڈونگ کے درمیان ملاقات میں ای کامرس، ایکو سسٹم پروڈکشن، صحت اور تعلیم کے محکموں کی ڈیجیٹلائزیشن پر تبادلہ خیال کیا گیا۔