اسلام آباد میں تعلیمی اداروں میں منشیات سپلائی کرنے والے 6 نائیجیرین باشندے گرفتار
- 16, دسمبر , 2024
نیوز ٹوڈے : اسلام آباد کے تعلیمی اداروں میں منشیات سپلائی کرنے والے نائیجیرین باشندوں کے 6 رکنی گینگ کو گرفتار کر لیا گیا ہے۔اے این ایف حکام کے مطابق سب سے پہلے اسلام آباد میں کارروائی کے دوران ایک نائیجیرین باشندے کو گرفتار کیا گیا۔ دوران تفتیش ملزم نے اپنے دیگر غیر ملکی ساتھیوں کے ملوث ہونے کا انکشاف کیا۔ حکام کا کہنا ہے کہ ملزم کی نشاندہی پر چھاپوں کے دوران سیکٹر جی 13 میں ایک ہوٹل کے قریب سے مزید 5 نائجیرین باشندوں کو گرفتار کیا گیا۔ ملزم کے فلیٹ پر چھاپہ مارا گیا جہاں سے 135 گرام کوکین اور 3.2 کلو گرام آئس برآمد ہوئی۔
حکام کے مطابق ملزمان نے ہاسٹلز اور تعلیمی اداروں میں طلباء کو منشیات فراہم کرنے کا اعتراف کیا ہے۔اے این ایف حکام کا کہنا ہے کہ رواں سال پاکستان میں منشیات کی اسمگلنگ کے الزام میں گرفتار کیے گئے غیر ملکی شہریوں کی بڑی تعداد کا تعلق افریقی ممالک سے ہے اور منشیات کے سمگلر سمگلنگ کے لیے نت نئے اور خطرناک طریقے اپنا رہے ہیں۔
حکام کا مزید کہنا تھا کہ تعلیمی اداروں میں منشیات کی سمگلنگ کے خلاف اے این ایف کی کارروائیاں جاری رہیں گی۔
تبصرے