پی ٹی آئی اور حکومت کے درمیان مذاکرات میں رکاوٹ کون ہے؟ بڑا دعویٰ سامنے آگیا

نیوز ٹوڈے :   رانا ثناء اللہ کا کہنا ہے کہ تحریک انصاف اور حکومت کے درمیان بامعنی مذاکرات کی راہ میں سب سے بڑی رکاوٹ عمران خان ہیں۔مقامی انگریزی اخبار دی نیوز سے گفتگو کرتے ہوئے رانا ثناء اللہ نے کہا کہ سیاسی جماعتوں کے درمیان مذاکرات کے حوالے سے نہ صرف اسٹیبلشمنٹ نے اپنی پالیسی واضح کر دی ہے بلکہ وزیر اعظم شہباز شریف نے بھی قومی اسمبلی سے اپنے حالیہ خطاب کے دوران پی ٹی آئی کو مذاکرات کی پیشکش کی ہے۔ تاہم ایوان زیریں کے اسی اجلاس کے دوران اپوزیشن لیڈر عمر ایوب نے وزیراعظم کی پیشکش کو توہین آمیز الفاظ میں مسترد کر دیا۔

انہوں نے کہا کہ عمران خان ماضی میں سیاسی مذاکرات کے حق میں تھے اور اب دلچسپی نہیں رکھتے۔ رانا ثناء اللہ کے مطابق بامعنی مذاکرات ضروری ہیں اور ہمیں اس کی طرف بڑھنا چاہیے لیکن مذاکرات کی راہ میں سب سے بڑی رکاوٹ عمران خان ہیں۔ انہوں نے کہا کہ پی ٹی آئی کی دوسرے درجے کی قیادت حکومت سے مذاکرات کے حق میں ہے لیکن ان کی اس طرح کے مذاکرات کی خواہش کے باوجود عمران خان نے ان سب کو مسترد کر دیا جس کے نتیجے میں 26 نومبر جیسے واقعات رونما ہوئے۔

سیاسی مشیر نے کہا کہ یہ (26 نومبر کا واقعہ) نہ صرف مذاکرات کے ممکنہ آغاز کے لیے شدید دھچکا تھا بلکہ یہ بھی واضح کر دیا کہ عمران خان اپنی پارٹی کی دوسرے درجے کی پوری قیادت کی رائے کو کوئی اہمیت نہیں دیتے۔ حکومت پی ٹی آئی کی دوسرے درجے کی قیادت سے رابطے میں ہے لیکن یہ لوگ بے بس ہیں اور پارٹی کے بانی چیئرمین کے ویٹو کی وجہ سے کچھ نہیں کر سکتے۔