دوسرا ون ڈے: پاکستان نے جنوبی افریقہ کو شکست دے کر سیریز جیت لی

نیوز ٹوڈے :   پاکستان نے 3 ایک روزہ میچوں کی سیریز کے دوسرے میچ میں جنوبی افریقہ کو 81 رنز سے شکست دے کر سیریز اپنے نام کر لی۔پاکستان کو تین میچوں کی سیریز میں جنوبی افریقہ پر 0-2 کی برتری حاصل ہے، پاکستان کے کامران غلام مین آف دی میچ قرار پائے۔

پاکستان نے تیسری بار جنوبی افریقہ میں ون ڈے سیریز جیتی، 21ویں صدی میں تین بار جنوبی افریقہ میں ون ڈے سیریز جیتنے والی پہلی ٹیم بن گئی۔کیپ ٹاؤن میں کھیلے جا رہے میچ میں جنوبی افریقی کپتان ٹیمبا باوما نے ٹاس جیت کر پاکستان کو بیٹنگ کی دعوت دی۔

جنوبی افریقہ کی دعوت پر پاکستان کی ٹیم 49.5 اوورز میں 329 رنز بنا کر آؤٹ ہو گئی۔ پہلی اننگزپاکستان کی جانب سے صائم ایوب نے 25، عبداللہ شفیق نے 0، بابر اعظم نے 73 اور کپتان محمد رضوان نے 80 رنز بنائے۔سلمان علی آغا نے 33 رنز کی اننگز کھیلی۔

اختتامی اوورز میں کامران غلام نے 5 چھکوں کی مدد سے 32 گیندوں پر 63 رنز بنائے۔ اس کے علاوہ عرفان خان نے 15، شاہین آفریدی نے 16، حارث رؤف نے 6 رنز بنائے۔جنوبی افریقہ کی جانب سے مفاکا نے 4، مارکو جانسن نے 3 وکٹیں حاصل کیں۔

میچ کی دوسری اننگز میں پاکستان کے 329 رنز کے ہدف کے تعاقب میں جنوبی افریقہ کے ہینرک کلاسن نے 74 گیندوں پر 4 چھکوں اور 8 چوکوں کی مدد سے 97 رنز بنائے۔جنوبی افریقی بلے باز ٹونی زیزورزی نے 34، ڈیوڈ ملر نے 29، ریکی وین ڈیر ڈیسن نے 23، ایڈن مارکرم نے 21 اور ٹیمبا بوما نے 12 رنز بنائے۔

پاکستانی فاسٹ بولر شاہین شاہ آفریدی نے 8 اوورز میں 47 رنز دے کر 4 وکٹیں حاصل کیں، نسیم شاہ نے 3 اور ابرار احمد نے 2 وکٹیں حاصل کیں جب کہ سلمان آغا نے ایک وکٹ حاصل کی۔

دوسرے ون ڈے کے لیے جنوبی افریقی ٹیم میں 4 تبدیلیاں کی گئی ہیں جب کہ پاکستانی ٹیم نے وننگ کمبی نیشن برقرار رکھا اور کوئی تبدیلی نہیں کی۔واضح رہے کہ پاکستان نے پہلے ون ڈے میں میزبان جنوبی افریقہ کو 3 وکٹوں سے شکست دے کر سیریز میں 1-0 کی برتری حاصل کی تھی۔