غیر ملکی سرمایہ کاری میں اضافہ، سابقہ ریکارڈ توڑدئیے

نیوز ٹوڈے :   اسٹیٹ بینک آف پاکستان کے مطابق سال 2024 میں ملک میں غیر ملکی سرمایہ کاری میں 11.58 فیصد اضافہ ہوا۔اسٹیٹ بینک کے اعلامیے کے مطابق سال 2024 کے 11 ماہ میں غیر ملکی سرمایہ کاری میں 11.58 فیصد کا اضافہ ہوا ہے۔ جنوری سے نومبر 2024 کے دوران غیر ملکی سرمایہ کاری کا حجم 2.05 بلین ڈالر تھا جو کہ سال 2023 کے پہلے 11 ماہ میں 1.84 بلین ڈالر تھا۔ اسٹیٹ بینک کے مطابق سال 2024 کے 11 ماہ میں غیر ملکی سرمایہ کاری 213.4 ملین ڈالر زیادہ رہی۔ اسٹیٹ بینک کا کہنا ہے کہ ملک کے نجی شعبے میں غیر ملکی سرمایہ کاری 23 فیصد اضافے سے 2.25 بلین ڈالر تک پہنچ گئی جب کہ نجی شعبے میں براہ راست غیر ملکی سرمایہ کاری میں 31 فیصد اضافہ ہوا۔

اسٹیٹ بینک کے مطابق نجی شعبے میں براہ راست سرمایہ کاری 46 فیصد اضافے سے 3.41 بلین ڈالر تک پہنچ گئی جبکہ نجی شعبے سے براہ راست سرمایہ کاری 93.5 فیصد اضافے سے 1.04 بلین ڈالر تک پہنچ گئی۔ اسٹیٹ بینک کے بیان میں کہا گیا ہے کہ 2024 کے پہلے 11 مہینوں میں سٹاک مارکیٹ سے 107.7 ملین ڈالر نکالے گئے، اور 2024 میں اوسطاً 9.8 ملین ڈالر ماہانہ نکالے گئے، جس میں سے 198.6 ملین ڈالر ملک کے پبلک سیکٹر سے نکالے گئے، جبکہ اوسط پبلک سیکٹر سے ماہانہ 1.8 ملین ڈالر نکالے گئے۔