خیبرپختونخوا حکومت کی جانب سے شادی کرنے والی لڑکیوں کے لیے خوشخبری
- 31, دسمبر , 2024
نیوز ٹوڈے : خیبرپختونخوا حکومت نے شادی کرنے والی مستحق لڑکیوں کو دو لاکھ روپے دینے کا اعلان کیا ہے۔
وزیر اعلیٰ علی امین گنڈا پور کی زیر صدارت محکمہ سماجی بہبود کا اجلاس ہوا جس میں جہیز فنڈ کے تحت مستحق بچیوں کی شادیوں کے لیے بڑے پیمانے پر پروگرام منعقد کرنے کا فیصلہ کیا گیا۔ صوبے کی 4 ہزار سے زائد مستحق لڑکیوں کی شادی جہیز کے فنڈز سے کی جائے گی اور اجتماعی شادیوں کی تقریبات کے اخراجات صوبائی حکومت برداشت کرے گی۔
اجلاس میں فیصلہ کیا گیا کہ شادی کرنے والی ان مستحق لڑکیوں کو بھی دو لاکھ روپے نقد دیے جائیں گے۔ ڈویژنل ہیڈ کوارٹرز کے بعد ضلعی سطح پر بھی اجتماعی شادیوں کے پروگرام منعقد کیے جائیں گے۔ وزیراعلیٰ علی امین گنڈا پور کا کہنا ہے کہ جہیز فنڈز کے تحت ہونے والی شادیوں میں ہر لحاظ سے اس بات کو یقینی بنایا جائے کہ حقدار کو ہی حق ملے۔
علی امین گنڈا پور نے ہدایت کی کہ پناہ گاہوں کے بجٹ کو صوبائی حکومت کے مستقل بجٹ کا حصہ بنایا جائے، صوبے میں غیر فعال پناہ گاہوں کو فوری طور پر فعال کیا جائے۔ علاوہ ازیں وزیراعلیٰ کے پی نے معذور طلبہ کو وہیل چیئرز فراہم کرنے کا فیصلہ کرلیا، پہلے مرحلے میں اعلیٰ تعلیمی اداروں کے معذور طلبہ کو وہیل چیئرز فراہم کی جائیں گی۔
اجلاس میں بزرگ شہریوں کے لیے اولڈ ایج ہوم کے قیام کا فیصلہ کیا گیا، اولڈ ایج ہوم میں بزرگ شہریوں کے لیے رہائش کے علاوہ تفریح کا بھی انتظام کیا جائے گا۔ وزیر اعلیٰ نے یتیم بچیوں کے لیے یتیم کارڈ جاری کرنے کا بھی اصولی فیصلہ کر لیا، وزیر اعلیٰ نے بزرگ بیواؤں کے لیے راشن کارڈ جاری کرنے کی تجویز سے بھی اتفاق کیا، راشن کارڈ کے تحت بزرگ بیواؤں کو ماہانہ پانچ ہزار روپے دینے کی تجویز ہے۔
انہوں نے مجوزہ فلاحی سرگرمیوں کو عملی جامہ پہنانے کے لیے ایک ہفتے میں ورکنگ پلان تیار کرنے کی ہدایت کی۔ علی امین نے کہا کہ بانی چیئرمین کے وژن کے مطابق صوبہ معاشرے کے غریب اور مستحق طبقات کی مدد کے لیے پرعزم ہے۔ کمزور اور نادار طبقات کی مدد اور سرپرستی اسلامی فلاحی ریاست کی اہم خصوصیات میں سے ایک ہے۔ صوبائی حکومت سماجی بہبود کے اقدامات کے لیے تمام دستیاب وسائل بروئے کار لائے گی۔
تبصرے