سینئر سفیر شفقت علی خان کو دفتر خارجہ کا نیا ترجمان مقرر کر دیا گیا

نیوز ٹوڈے :     ایڈیشنل سیکرٹری خارجہ برائے یورپ شفقت علی خان کو وزارت خارجہ کا نیا ترجمان مقرر کر دیا گیا ہے۔ شفقت علی خان دفتر خارجہ کی سابق ترجمان ممتاز زہرہ بلوچ کی جگہ لیں گے، جو جلد ہی فرانس میں پاکستان کی سفیر کا عہدہ سنبھالیں گے۔

55 سالہ شفقت خان اس وقت یورپ کے لیے ایڈیشنل سیکریٹری خارجہ کے طور پر خدمات انجام دے رہے ہیں۔ وہ پاکستان کے خارجہ امور میں 30 سال سے زیادہ کا تجربہ رکھنے والے سفارت کار ہیں۔

وہ 1993 میں سروس جوائن کرنے کے بعد سے مختلف عہدوں پر فائز رہے ہیں۔ وہ 2020 سے 2023 تک روس اور 2017 سے 2020 تک پولینڈ میں سفیر کے طور پر بھی خدمات انجام دے چکے ہیں۔

اس کے علاوہ وہ 2016 سے 2017 تک دفتر خارجہ میں ڈائریکٹر جنرل برائے یورپ اور 2010 سے 2013 تک اقوام متحدہ (جنیوا) میں پاکستانی مشن میں نائب مستقل نمائندے سمیت کئی اہم عہدوں پر کام کر چکے ہیں، جب کہ وہ 2014 سے 2015 تک قومی اسمبلی کے سپیکر  سفارتی مشیر کے طور پر بھی خدمات انجام دے چکے ہیں۔ ۔

شفقت علی خان بیجنگ میں پاکستانی سفارتخانے میں سیاسی اور سٹریٹجک امور کے مشیر کے طور پر بھی کام کر چکے ہیں۔انہوں نے اپنی تعلیمی قابلیت کنگز کالج لندن، قائداعظم یونیورسٹی اسلام آباد اور اپسالہ یونیورسٹی (سویڈن) سے حاصل کی ہے۔