کیپ ٹاؤن ٹیسٹ: بابر اعظم اور شان مسعود کی جوڑی نے نیا عالمی ریکارڈ قائم کر دیا

نیوز ٹوڈے :   جنوبی افریقہ کے خلاف سیریز کے دوسرے اور آخری ٹیسٹ میچ میں پاکستانی بلے باز بابر اعظم اور شان مسعود نے شراکت داری کا نیا عالمی ریکارڈ قائم کر دیا۔پاکستان اور جنوبی افریقہ کے درمیان 2 ٹیسٹ میچوں کی سیریز کا آخری میچ کیپ ٹاؤن میں جاری ہے۔ جہاں پاکستانی ٹیم نے پہلی اننگز میں میزبان ٹیم کے 615 رنز کے جواب میں 194 رنز بنائے اور فالو آن پر مجبور ہو گئی۔

تاہم دوسری اننگز میں پاکستانی بیٹنگ لائن سنبھل گئی۔ کپتان شان مسعود اور بابر اعظم نے پہلی وکٹ کے لیے 205 رنز کی شراکت قائم کر کے واپسی کی اچھی کوشش کی۔

تیسرے دن کے کھیل کے اختتام پر شان مسعود 102 رنز ناٹ آؤٹ اور خرم شہزاد 8 رنز پر کھیل رہے ہیں اور ٹیم کا مجموعی اسکور ایک وکٹ کے نقصان پر 213 رنز ہے۔ بابر اعظم 81 رنز بنا کر آؤٹ ہوئے، جنوبی افریقہ کو اب بھی 208 رنز کی برتری حاصل ہے۔ پہلی اننگز میں فالو آن کرنے والے پاکستانی بلے باز شان مسعود اور بابر اعظم نے ٹیسٹ میچ میں شراکت کا نیا ریکارڈ قائم کر دیا ہے۔

جنوبی افریقہ کے خلاف دوسری اننگز میں 205 رنز کی اوپننگ پارٹنرشپ ٹیسٹ کرکٹ کی تاریخ میں فالو آن کرنے والی ٹیم کی طرف سے دوسری اننگز میں سب سے بڑی اوپننگ شراکت ہے۔

اس کے علاوہ شان اور بابر کی اوپننگ پارٹنرشپ ٹیسٹ کرکٹ میں جنوبی افریقہ میں پاکستان کی جانب سے سب سے زیادہ اوپننگ پارٹنرشپ ہے۔اس سے قبل 1998 میں سعید انور اور عامر سہیل نے اسی گراؤنڈ پر جنوبی افریقہ کے خلاف 101 رنز کی اوپننگ پارٹنرشپ کی تھی۔

واضح رہے کہ جنوبی افریقہ کو پاکستان کے خلاف سیریز میں ایک صفر کی برتری حاصل ہے اور میزبان ٹیم آئی سی سی ٹیسٹ چیمپئن شپ کے فائنل کے لیے بھی کوالیفائی کر چکی ہے۔