امید ہے کہ کرم میں امن کو یقینی بنانے کے لیے تمام اسٹیک ہولڈرز مل کر کام کریں گے: وزیراعظم

14, جنوری , 2025

نیوز ٹوڈے : وزیراعظم شہباز شریف نے کہا ہے کہ امید ہے کہ کرم میں امن کو یقینی بنانے کے لیے تمام اسٹیک ہولڈرز مل کر کام کریں گے۔وفاقی کابینہ کے اجلاس سے خطاب کرتے ہوئے وزیراعظم نے کہا کہ تعلیم کے شعبے میں صوبوں کا اہم کردار ہے، وفاق کو صوبوں کے ساتھ مل کر تعلیم کے شعبے میں چیلنجز سے نمٹنے کے لیے کام کرنا چاہیے۔ انہوں نے کہا کہ پی آئی اے کی یورپ کے لیے پروازوں کا آغاز کامیابی ہے، گزشتہ حکومت کے ایک وزیر کی تقریر کے تباہ کن نتائج نکلے، شکر ہے کہ جو بندشیں لگائی گئی تھیں وہ اٹھا لی گئی ہیں، امید ہے لندن کے لیے پروازیں جلد شروع ہو جائیں گی۔

شہباز شریف کا کہنا تھا کہ ضلع کرم میں حالات معمول پر آ رہے ہیں، امن معاہدے کے بعد مورچے گرائے جا رہے ہیں، خوراک اور ادویات کا سامان بھی پہنچایا جا رہا ہے، امید ہے تمام سٹیک ہولڈرز مل کر امن کو یقینی بنائیں گے۔وزیراعظم کا مزید کہنا تھا کہ فتنہ الخوارج کے خلاف دن رات آپریشنز جاری ہیں اور امید ہے کہ ان کارروائیوں کے نتیجے میں فتنہ الخوارج کا مکمل خاتمہ ہو جائے گا۔