گورنر پنجاب کا وزیراعظم سے بڑا مطالبہ

نیوز ٹوڈے :   گورنر پنجاب سردار سلیم حیدر نے کہا ہے کہ اگر پیپلز پارٹی ان کا ساتھ نہ دیتی تو آج حکومت نہ ہوتی اور نظام نہ چلتا۔ وزیراعظم اب بھی بلاول بھٹو زرداری کے تحفظات کے حوالے سے سنجیدگی کا مظاہرہ کریں ورنہ معاملات ہاتھ سے نکل سکتے ہیں۔ انہوں نے کہا کہ یہ ماننا پڑے گا کہ صوبوں کو ان کی ضروریات کے مطابق پانی نہیں مل رہا۔ سندھ کو پہلے ہی پانی کی قلت کا سامنا ہے۔ ایسے میں اگر دریائے سندھ سے نہریں نکالنے کی کوشش کی گئی تو نقصان سندھ کو ہوگا۔

صوبوں کو اعتماد میں لیے بغیر نہریں نکالنے کا عمل ناقابل قبول ہوگا۔ اس حوالے سے وزیراعظم پیپلز پارٹی کے تحفظات پر توجہ دیں اور ان کا حل نکالیں ورنہ معاملات ہاتھ سے نکل سکتے ہیں جس سے نظام، جمہوریت اور دونوں اتحادی جماعتوں کو نقصان ہوگا۔ اس لیے بلاول بھٹو کے تحفظات دور کرنے کی ضرورت ہے، جس کے لیے وفاق اور اتحادی جماعت مسلم لیگ ن کو سنجیدگی کا مظاہرہ کرنا چاہیے۔ پیپلز پارٹی چیزوں اور نظام کے کام کو بہتر بنانے کی ہر ممکن کوشش کرے گی۔

ایک سوال کے جواب میں گورنر پنجاب نے کہا کہ میری اور وزیراعلیٰ مریم نواز میں گورنر اور وزیراعلیٰ خیبرپختونخوا کی طرح لڑائی نہیں ہے۔ میں مریم نواز سے ملوں یا نہ ملنا کسی لڑائی کا نتیجہ نہیں ہے۔ ہم جب چاہیں گے ملیں گے۔ ہم صوبے میں گاڑی کے دو پہیے ہیں۔

عوام اور صوبے کے حق میں فیصلے درست نہیں تو تنقید کرنا میرا حق ہے۔ مجھے امید ہے کہ وزیر اعلیٰ پنجاب میری تنقید کو مثبت انداز میں لیں گے اور معاملات کو بہتر کرنے کی کوشش کریں گے۔ اگر کوئی مسئلہ ہوا تو ہم دونوں کو بھگتنا پڑے گا۔ وزیراعلیٰ پنجاب کی کارکردگی پر میری خوشی یا ناراضگی بے معنی ہے۔ اس کی کارکردگی کا پتہ تب چلے گا جب وہ عوام میں جائے گی اور عوام اس کے اعمال کا فیصلہ کریں گے۔