چیمپئنز ٹرافی: پاکستان میں میچ کے ٹکٹوں کی قیمت کیا ہوگی؟

15, جنوری , 2025

نیوز ٹوڈے : آئی سی سی چیمپئنز ٹرافی کے میچز کے ٹکٹوں کی فروخت پر مشاورت مکمل کر لی گئی ہے۔ذرائع کے مطابق چیمپئنز ٹرافی کے میچز کے ٹکٹوں کی فروخت جلد شروع ہو جائے گی، پاکستان میں میچز کی کم از کم قیمت ایک ہزار روپے تک ہونے کا امکان ہے۔

چیمپئنز ٹرافی کے میچز کے ٹکٹوں کی زیادہ سے زیادہ قیمت 2500 روپے تک جانے کا امکان ہے۔ ذرائع کے مطابق لاہور، کراچی اور راولپنڈی کے مقامات پر ٹکٹوں کی قیمتیں مختلف ہوں گی اور میچز کے لیے وی آئی پی، پریمیم، فرسٹ کلاس اور مہمان نوازی کی کیٹیگریز کے ٹکٹ ہوں گے۔

سیمی فائنل میچ کے لیے ٹکٹ کی کم از کم قیمت 2500 روپے رکھنے کا امکان ہے۔واضح رہے کہ چیمپئنز ٹرافی 2025 پاکستان اور یو اے ای میں ہائبرڈ ماڈل کے تحت شیڈول ہے، ایونٹ کا آغاز 19 فروری سے کراچی میں پاک نیوزی لینڈ کے میچ سے ہوگا۔