نومنتخب امریکی صدر ڈونلڈ ٹرمپ کی حلف برداری کی تیاریاں عروج پر پہنچ گئی

نیوز ٹوڈے :    نومنتخب امریکی صدر ڈونلڈ ٹرمپ کی دوسری مدت کے لیے حلف اٹھانے کی تیاریاں زوروں پر ہیں۔ڈونلڈ ٹرمپ 20 جنوری کو دوسری مدت کے لیے حلف اٹھائیں گے، افتتاحی تقریب امریکی کیپیٹل کی سیڑھیوں پر ہوگی۔ جہاں ٹرمپ باضابطہ طور پر کانگریس کے ارکان، سپریم کورٹ، ان کی آنے والی انتظامیہ اور ہزاروں حاضرین کے سامنے اپنے عہدے کا حلف اٹھائیں گے۔

تقریب کے لیے سخت حفاظتی اقدامات کیے جا رہے ہیں، 25000 پولیس اہلکار تعینات کیے گئے ہیں اور 48 کلومیٹر طویل سیاہ حفاظتی باڑ کے ساتھ ساتھ حفاظتی چوکیاں بھی قائم کی گئی ہیں۔وائٹ ہاؤس سے کیپیٹل تک 3 کلومیٹر تک کا علاقہ گاڑیوں کی آمدورفت کے لیے بند کر دیا جائے گا۔صدر جو بائیڈن نے تصدیق کی ہے کہ وہ ڈونلڈ ٹرمپ کی صدارتی تقریب میں "یقینی طور پر" شرکت کریں گے۔

یاد رہے کہ ٹرمپ نے 20 جنوری 2021 کو 46 ویں امریکی صدر کے طور پر بائیڈن کی حلف برداری میں شرکت نہیں کی تھی۔ وہ 150 سالوں میں پہلے صدر تھے جنہوں نے امریکہ میں اقتدار کی پرامن منتقلی کی روایت کو توڑا۔

ٹرمپ کے حلف برداری میں شرکت کے لیے بڑی عالمی طاقتوں اور اہم امریکی اتحادیوں کو دعوت نامے بھیجے گئے ہیں۔ امریکہ کے نو منتخب صدر ڈونلڈ ٹرمپ کے حلف برداری کے لیے فنڈ ریزنگ نے ریکارڈ 170 ملین ڈالر اکٹھے کیے ہیں۔ جس میں بڑے تاجروں، ٹیک ایگزیکٹوز اور ڈونرز نے دل کھول کر تعاون کیا۔ جگہ کی کمی کے باعث لاکھوں ڈالرز دینے والوں کو بھی وی آئی پی ٹکٹ نہیں مل رہا۔

گرین ووڈ ٹرمپ کے افتتاح کے لیے کیپیٹل میں پرفارم کریں گے۔ میوزک اسٹار کیری انڈر ووڈ تقریب میں پرفارم کریں گی۔کرسٹوفر فارماسیو کو پروگرام کے اختتام پر قومی ترانہ بجانے کے لیے منتخب کیا گیا ہے۔