پاکستانی ٹینس کے لیے بڑی خوشخبری، شایان آفریدی نے 2 ایونٹ جیت لیے

نیوز ٹوڈے :     پاکستان کے شایان آفریدی نے آئی ٹی ایف ایشیا 14 اور انڈر ڈیولپمنٹ چیمپئن شپ 2025 جیت لی۔پاکستان کے شایان آفریدی نے کولمبو، سری لنکا میں منعقدہ آئی ٹی ایف ایشیا 14 اور انڈر ڈیولپمنٹ چیمپئن شپ 2025 ویک-1 ریجنل کوالیفائنگ ایونٹ برائے جنوبی مشرقی اور مشرقی ایشیاء جیت لیا۔فائنل میں، شایان نے ٹورنامنٹ کے دوسرے سیڈ، سنگاپور کے پاک نکولس منگ این کو 6-3، 6-7(3) 6-4 کے اسکور کے ساتھ شکست دے کر ویک-1 کے لیے چیمپئن شپ کا ٹائٹل جیت لیا۔

پاکستان سپورٹس بورڈ کے ڈائریکٹر جنرل محمد یاسر پیرزادہ نے شایان کو اس کی غیر معمولی کارکردگی پر مبارکباد دی اور کہا کہ 'شایان کی جیت پاکستان میں کھیلوں کے روشن مستقبل کا واضح ثبوت ہے'۔ انہوں نے اسپورٹس بورڈ کے ملک کے کھلاڑیوں کی حمایت اور بین الاقوامی پلیٹ فارمز پر ان کی ترقی میں سہولت فراہم کرنے کے عزم کا اعادہ کیا۔

پاکستان ٹینس فیڈریشن (PTF) کے صدر جناب اعصام الحق قریشی نے پاکستان 14 اور انڈر ٹیم کے دورہ سری لنکا میں سہولت فراہم کرنے پر جناب یاسر پیرزادہ کا تہہ دل سے شکریہ ادا کیا۔انہوں نے اس ناقابل یقین کامیابی پر شایان آفریدی کو بھی دلی مبارکباد پیش کی اور اسے پاکستان میں ٹینس کے لیے ایک اہم سنگ میل قرار دیا۔

ٹورنامنٹ کے اضافی نتائج میں راشد علی نے بوائز کیٹگری میں 32 شرکاء میں سے 12ویں پوزیشن حاصل کی۔گرلز کیٹگری میں بسمل ضیاء اور ہاجرہ سہیل نے شاندار کارکردگی کا مظاہرہ کرتے ہوئے 16 کھلاڑیوں میں سے بالترتیب 6ویں اور 7ویں پوزیشن حاصل کی۔