ایک دو روز میں پی ٹی آئی کے مطالبات کا جواب تیار کر کے پیش کروں گا، رانا ثناء

  نیوز ٹوڈے :   پاکستان تحریک انصاف کے مطالبات کا جواب ایک دو روز میں تیار کر کے پیش کر دوں گا، رانا ثناء مذاکرات میں کوئی حکم نامہ نہیں ہوتا، یہ کوئی طریقہ نہیں کہ ہم آپ کے مطالبات کا جواب دینا چاہتے ہیں اور آپ جواب لینے کو تیار نہیں وزیراعظم کے مشیر برائے سیاسی امور رانا ثناء اللہ کا کہنا ہے کہ آئندہ ایک دو روز میں پی ٹی آئی کے مطالبات کا جواب تیار کرکے ان کے سامنے پیش کریں گے، پی ٹی آئی اس پر غور کرے اور ہم سے بات کرے۔

 رانا ثناء اللہ نے کہا کہ مذاکرات میں کوئی حکم نامہ نہیں ہوتا، جب بھی کوئی راستہ تلاش کرنا ہو تو وہ راستہ تلاش کرنا ہوگا، یہ کوئی راستہ نہیں کہ ہم آپ کے مطالبات کا جواب دینا چاہتے ہیں اور آپ جواب ماننے کے لیے تیار نہیں۔

انہوں نے کہا کہ تحریک انصاف کے مطالبات کا ہمیں بھی علم تھا، لیکن پھر بھی تین ملاقاتوں کا انتظار کیا، ایک دو روز میں ان کے مطالبات کا جواب پیش کر دیں گے۔

اس کے علاوہ رانا ثناء اللہ نے کہا کہ پی ٹی آئی کے بانی عمران خان خود کہتے تھے کہ پراپرٹی ٹائیکون سب کو اندھا کر دیتے ہیں لیکن وزیر اعظم بن کر جو کچھ کیا اس کے بعد وہ اندھے ہو گئے۔رانا ثناء اللہ نے کہا کہ یہ معاملات شہزاد اکبر کے ذریعے طے ہوئے اور پراپرٹی ٹائیکون کو بلیک میل کرکے جو کچھ حاصل کرنا تھا وہ حاصل کرلیا۔

پی ای سی اے ایکٹ میں ترامیم کا حوالہ دیتے ہوئے رانا ثناء اللہ نے کہا کہ سوشل میڈیا کے بگاڑ کو کم شدت سے ٹھیک نہیں کیا جا سکتا۔ 20 ترامیم کی ضرورت پڑی تو لائیں گے، اس قانون کا غلط استعمال ہوا تو عدالتیں ہیں۔

واضح رہے کہ پاکستان تحریک انصاف (پی ٹی آئی) نے حکومت کے ساتھ مذاکرات کے چوتھے دور میں شرکت نہ کرنے کا اعلان کیا ہے۔

پی ٹی آئی کی مذاکراتی کمیٹی کے رکن عمر ایوب کا کہنا ہے کہ مذاکرات کے چوتھے دور سے قبل جوڈیشل کمیشن کا قیام ضروری ہے اور جب تک جوڈیشل کمیشن کا قیام عمل میں نہیں آتا وہ مذاکرات کے چوتھے دور میں نہیں بیٹھیں گے۔