پی ٹی آئی خیبرپختونخوا کے صدر علی امین گنڈا پور کے مخالف دھڑے کی اندرونی کہانی سامنے آگئی

نیوز ٹوڈے :   علی امین گنڈا پور کے خلاف ماضی میں سرگرم ایک گروپ نے مبینہ طور پر پی ٹی آئی کے بانی کے خلاف شکایات درج کرائی تھیں اور اس گروپ میں شامل افراد نے جیل میں پیشی اور مقدمات میں علی امین گنڈا پور کے خلاف شکایات کے انبار لگا دیے تھے۔

ذرائع کا کہنا ہے کہ جن لوگوں نے علی امین گنڈا پور کے خلاف عمران خان کو مبینہ طور پر شکایات درج کروائیں ان میں عاطف خان، شکیل خان، جنید اکبر اور مشال یوسفزئی شامل ہیں۔ اس کے علاوہ قاضی انور ایڈووکیٹ اور دیگر وکلاء نے بھی علی امین گنڈا پور کے خلاف مبینہ طور پر شکایات درج کرائی ہیں۔ اس حوالے سے پی ٹی آئی کے ترجمان شیخ وقاص اکرم نےکہا کہ پی ٹی آئی میں کوئی دھڑے بندی نہیں، علی امین گنڈا پور نے پی ٹی آئی کے بانی کا فیصلہ تسلیم کیا اور جنید اکبر کو بھی مبارکباد دی۔

شیخ وقاص اکرم نے کہا کہ علی امین گنڈا پور پر دو عہدوں کا بوجھ تھا، علی امین گنڈا پور بطور وزیراعلیٰ صوبے اور پارٹی کی خدمت کرتے رہیں گے۔

انصاف لائرز فورم کے صوبائی صدر قاضی انور ایڈووکیٹ نے جیو نیوز کو بتایا کہ پی ٹی آئی کے بانی نے صرف اتنا کہا تھا کہ احتساب کے لیے کوئی طریقہ کار ہونا چاہیے، میری درخواست پر احتساب کمیٹی بنائی گئی۔

قاضی انور ایڈووکیٹ نے کہا کہ پی ٹی آئی کے بانی نے وزیراعلیٰ علی امین گنڈا پور کے خلاف کوئی شکایت نہیں کی، پی ٹی آئی کے بانی نے جنید اکبر کو صوبائی صدر مقرر کیا۔

انہوں نے کہا کہ مجھے نہیں معلوم کہ وزیراعلیٰ سے صوبائی صدارت چھین کر جنید اکبر کو کیوں دی گئی، پی ٹی آئی کے انٹرا پارٹی انتخابات میں علی امین گنڈا پور بلامقابلہ صوبائی صدر منتخب ہوئے۔یاد رہے کہ چند روز قبل عمران خان نے علی امین گنڈا پور سے پی ٹی آئی خیبرپختونخوا کی صدارت واپس لے کر رکن قومی اسمبلی جنید اکبر کو پارٹی کا صوبائی صدر مقرر کیا تھا۔

ذرائع کے مطابق عمران خان نے علی امین گنڈا پور کو خیبرپختونخوا میں گورننس اور دہشت گردی پر اپنی توجہ مرکوز کرنے کی ہدایات بھی جاری کیں۔ گنڈا پور مخالف دھڑے کو پی ٹی آئی پختونخوا کی صدارت ملنے کی اندرونی کہانی سامنے آگئی۔