بشریٰ بی بی کی گرفتاری پر احتجاج کیوں نہیں ہوا؟ عمران خان وزیراعلیٰ خیبرپختونخوا سے ناراض

نیوز ٹوڈے :   پاکستان تحریک انصاف (پی ٹی آئی) کے بانی عمران خان گزشتہ دنوں اپنی اہلیہ بشریٰ بی بی کی گرفتاری پر خیبرپختونخوا میں احتجاج نہ کرنے پر کے پی کے وزیراعلیٰ علی امین گنڈا پور سے ناراض تھے۔

پیر کو پی ٹی آئی کے بانی عمران خان نے علی امین گنڈا پور سے اڈیالہ جیل میں ملاقات کی۔ ملاقات میں عمران خان نے علی امین گنڈا پور پر برہمی کا اظہار کیا۔ پی ٹی آئی کے بانی نے کہا کہ بشریٰ بی بی کی گرفتاری پر خیبرپختونخوا میں احتجاج کیوں نہیں ہوا؟

ذرائع کا کہنا ہے کہ علی امین سے ملاقات میں عمران خان نے خیبرپختونخوا میں کرپشن کی روک تھام کے لیے اقدامات پر زور دیا۔ پی ٹی آئی کے بانی کا کہنا تھا کہ صوبے میں کرپشن کی بہت سی کہانیاں اور تفصیلات سامنے آرہی ہیں، آئندہ کرپشن اور ناقص کارکردگی کی کوئی شکایت موصول نہیں ہونی چاہیے۔

ذرائع کے مطابق عمران خان نے علی امین کو عاطف خان سمیت پارٹی رہنماؤں سے حکومتی معاملات پر مشاورت کرنے کی ہدایت کی اور خیبرپختونخوا میں گڈ گورننس پر زور دیا۔

ذرائع کا کہنا ہے کہ عمران خان نے علی امین کی محسن نقوی کے ساتھ تصاویر پر بھی برہمی کا اظہار کیا۔ ذرائع کے مطابق ملاقات میں عمران خان نے علی امین گنڈا پور کو ہدایت کی کہ وہ محسن نقوی کا قریبی دوست بننے کے بجائے گورننس پر توجہ دیں۔

حال ہی میں عمران خان نے وزیر اعلیٰ علی امین گنڈا پور کو پارٹی کی صوبائی صدارت سے ہٹا کر ان کی جگہ جنید اکبر کو صدر مقرر کیا تھا۔خیال رہے کہ 17 جنوری کو احتساب عدالت نے پی ٹی آئی کے بانی عمران خان کی اہلیہ بشریٰ بی بی کو 190 ملین پاؤنڈ کیس میں 7 سال قید کی سزا سنائی تھی جس کے بعد بشریٰ بی بی کو کمرہ عدالت سے تحویل میں لے لیا گیا تھا۔