ٹیسٹ سریز : پاکستان نے اب تک کی تیز ترین ٹیم سنچری کا ریکارڈ بنا لیا

نیوزٹوڈے: کولمبو کے سنہالیز اسپورٹس کلب کرکٹ گراؤنڈ میں پاکستانی ٹیم نے سری لنکا کے خلاف دو ٹیسٹ میچوں کی سیریز کے دوسرے ٹیسٹ کا شاندار انداز میں آغاز کیا۔قومی ٹیم نے پہلے بولنگ کرتے ہوئے نسیم شاہ اور ابرار احمد کی شاندار بولنگ کی بدولت ہوم سائیڈ کو 166 رنز پر ڈھیر کردیا۔جواب میں، بابر اعظم کی قیادت میں ٹیم نے جارحانہ انداز کے ساتھ اننگز کا آغاز کیا، صرف 16.4 اوورز (100 گیندوں) میں ریکارڈ ساز پہلے سو رنز بنائے۔ غور طلب ہے کہ 21 ویں صدی میں یہ پہلا موقع ہے کہ پاکستانی ٹیم نے اپنی پہلی سنچری 100 گیندوں میں اسکور کی، یہ 21 ویں صدی کی تیز ترین سنچری ہے۔

مہمان ٹیم نے امام الحق کو کھو دیا، جب وہ صرف چھ رنز پر بیٹنگ کر رہے تھے، لیکن شان مسعود اور عبداللہ شفیق نے شاندار کارکردگی کا مظاہرہ کیا۔عبداللہ اور شان نے 108 رنز کی شراکت قائم کی اس سے قبل شان 47 گیندوں پر 51 رنز بنا کر اپنی وکٹ گنوا بیٹھے۔ عبداللہ، جو فی الحال 71 رنز پر بیٹنگ کر رہے ہیں، بڑا اسکور کرنے اور مین ان گرین کو پہلی اننگز میں بڑی برتری فراہم کرنے کے لیے تیار نظر آتے ہیں۔پاکستان گزشتہ ہفتے گال میں سیریز کا پہلا ٹیسٹ میچ چار وکٹوں سے جیت کر سیریز میں 1-0 کی برتری حاصل کر رہا ہے، سعود شکیل نے اپنی پہلی ڈبل سنچری اسکور کی۔