لاہور میں ٹرانسپورٹ کرایوں میں 10 فیصد کمی کا فیصلہ

17, اکتوبر , 2023

نیوزٹوڈے: نگراں وزیراعلیٰ محسن نقوی نے صوبائی وزیر ٹرانسپورٹ کو ایندھن کی قیمتوں میں حالیہ کمی کا فائدہ عوام تک پہنچانے کو یقینی بنانے کا حکم دیا ہے۔وزیراعلیٰ پنجاب نے کرایوں میں 10 فیصد کمی کے لیے متعلقہ حکام کو 48 گھنٹے کی ڈیڈ لائن دی ہے۔ صوبائی وزیر ٹرانسپورٹ ٹرانسپورٹ مالکان کو حکم پر عمل درآمد کرنے کا کہیں گے۔

اطلاعات کے مطابق صوبائی دارالحکومت میں ٹرانسپورٹ آپریٹرز نے پہلے ہی طویل اور مختصر روٹس کے کرایوں میں کمی کر دی ہے۔ لاہور سے کراچی کا کرایہ 7000روپے سے 6,850 روپے کم کر دیا گیا ہے۔ علاوہ ازیں دیگر وزراء اور محکموں کو بھی مختلف اشیاء کی قیمتوں میں کمی کے احکامات جاری کر دیے گئے ہیں۔ چیف سیکرٹری کو روزمرہ استعمال کی اشیاء کی قیمتیں کم کرنے کا کام سونپا گیا ہے۔

وہ پنجاب بھر کے کمشنرز اور ڈپٹی کمشنرز سے رابطے میں رہیں گے تاکہ قیمتوں میں کمی کے لیے کیے گئے اقدامات کا جائزہ لیا جا سکے۔ حال ہی میں حکومت نے پیٹرول کی قیمت میں 40 روپے فی لیٹر کمی کا اعلان کیا تھا۔.