مولانا طاہر اشرفی ،پاکستان کے نگران وزیراعظم کے معاون خصوصی مقرر

نیوزٹوڈے: نگراں وزیراعظم انوارالحق کاکڑ نے مولانا طاہر اشرفی کو بین المذاہب ہم آہنگی کے لیے اپنا خصوصی نمائندہ (ایس اے پی ایم) مقرر کردیا۔ وہ مشرق وسطیٰ اور اسلامی ممالک کے امور پر وزیراعظم کی معاونت کریں گے۔ وزیراعظم کے پرنسپل سیکرٹری توقیر شاہ نے بھی طاہر اشرفی کی تعیناتی کا نوٹیفکیشن جاری کر دیا ہے۔

واضح رہے کہ اشرفی عمران خان کے دور حکومت میں بھی وزیراعظم کے نمائندہ خصوصی کے فرائض سرانجام دے چکے ہیں۔ پاکستان علماء کونسل کے چیئرمین حافظ محمد طاہر محمود اشرفی نے پیر کے روز ترکی کے صدر برائے مذہبی امور ڈاکٹر علی ایرباس سے ملاقات کی۔

ایک بیان میں کہا گیا کہ دونوں رہنماؤں نے غزہ سمیت فلسطینی علاقوں کے خلاف جاری اسرائیلی جارحیت کی شدید مذمت کی اور اقوام متحدہ اور عالمی برادری پر زور دیا کہ وہ وحشیانہ بمباری کو فوری طور پر رکوانے کے لیے مزید فعال کردار ادا کریں۔ انہوں نے اس بات پر زور دیا کہ اسرائیل کے اقدامات بدترین جنگی جرائم ہیں، جن میں غزہ کے لوگوں پر ڈھائے جانے والے غیر انسانی مظالم بشمول اسکولوں، ہسپتالوں اور امدادی ٹیموں پر حملے شامل ہیں۔دونوں رہنماؤں نے اس بات پر زور دیا کہ مسئلہ فلسطین کو اقوام متحدہ کی قراردادوں کے مطابق حل کیا جانا چاہیے۔ انہوں نے فلسطین کی 1967 سے پہلے کی حیثیت کو بحال کرنے کی وکالت کی۔