اگلے 24 گھنٹوں میں پاکستان کے بڑے شہروں میں موسم کے حوالے سے اہم خبر

نیوز  ٹوڈے: پاکستان کے محکمہ موسمیات (پی ایم ڈی) نے آئندہ 24 گھنٹوں کے دوران ملک کے بیشتر علاقوں میں موسم سرد اور خشک رہنے کی پیش گوئی کی ہے۔ اسلام آباد، راولپنڈی، لاہور سمیت پنجاب اور سندھ میں موسم ابرآلود رہے گا۔ بلوچستان کے مغربی، جنوبی اور شمالی علاقوں میں بارش اور پہاڑوں پر برفباری کا امکان ہے۔

ملک کے شمالی علاقوں میں بادل چھائے رہیں گے، گلگت بلتستان، بالائی خیبرپختونخوا اور کشمیر میں ہلکی بارش اور پہاڑوں پر برفباری کا امکان ہے۔ آئندہ چند دنوں میں دو نئے مغربی ہوا کے نظام کے ملک میں داخل ہونے کی توقع ہے۔ پہلے سسٹم سے 3 سے 9 جنوری تک بلوچستان کے مغربی، بالائی اور جنوبی علاقوں میں بارش متوقع ہے۔ شمال مشرقی بلوچستان کے پہاڑی علاقوں میں برف باری کا بھی امکان ہے۔

اس دوران کراچی سمیت سندھ کے بعض علاقوں میں ہلکی بارش یا بوندا باندی کا بھی امکان ہے۔ دوسرا سسٹم 9 سے 15 جنوری تک ملک کے شمالی علاقوں، خیبرپختونخوا اور کشمیر میں بارش اور برف باری کا امکان ہے۔ پنجاب کے بیشتر علاقوں میں تیز بارش کا امکان کم ہے۔ شمالی، شمال مغربی، شمال مشرقی اور وسطی پنجاب کے بعض مقامات پر بارش کا بھی امکان ہے۔

دوسری جانب اسلام آباد اور راولپنڈی میں چھائی دھند کے باعث اسلام آباد انٹرنیشنل ایئرپورٹ پر پروازوں کا شیڈول درہم برہم ہوگیا۔ پاکستان انٹرنیشنل ایئرلائنز کے ترجمان نے تصدیق کی کہ دھند کے باعث مختلف ملکی اور بین الاقوامی پروازیں تاخیر کا شکار ہوئیں۔