وزیراعلیٰ کے حلقے میں 3 سالہ بچے پر بجلی چوری کا مقدمہ

نیوز ٹوڈے :  خیبرپختونخوا کے وزیراعلیٰ علی امین گنڈاپور کے حلقے ڈیرہ اسماعیل خان میں حیران کن واقعہ سامنے آیا ہے جہاں ایک تین سال کے بچے پر بجلی چوری کا مقدمہ درج کر دیا گیا ہے۔ پیسکو واپڈا نے اس بچے، جس کا نام ضیغم عباس ہے، پر بجلی چوری کا الزام لگایا ہے۔ بچے کے وکیل کے مطابق ضیغم عباس کے خلاف ایف آئی آر درج کی گئی ہے جس کی بنا پر اسے عدالت میں پیش کیا گیا۔ ایڈیشنل سیشن جج نے بچے کی عمر اور حالت کو دیکھتے ہوئے بیان حلفی طلب کیا اور کیس کو ختم کر دیا۔ وکیل نے مزید بتایا کہ پیسکو واپڈا کے اہلکاروں کو یہ علم نہیں تھا کہ آیا یہ بچہ ان کا صارف بھی ہے یا نہیں۔

 یہ بات بھی قابل ذکر ہے کہ وزیراعلیٰ علی امین گنڈاپور نے حال ہی میں بجلی کی لوڈشیڈنگ کم کرنے کی مہم کا آغاز کیا ہے۔ انہوں نے پیسکو کو وارننگ دی تھی کہ اگر لوڈشیڈنگ میں کمی نہ ہوئی تو وہ خود انتظام سنبھال لیں گے۔ اس دھمکی کے بعد پیسکو نے لوڈشیڈنگ میں کمی کرنے پر اتفاق کیا۔ وزیراعلیٰ اور پیسکو کے چیف کے درمیان ہونے والی ملاقات میں لوڈشیڈنگ کے نئے شیڈول پر اتفاق کیا گیا جس کے تحت لوڈشیڈنگ کو 22 گھنٹے سے کم کر کے 18 گھنٹے اور بعد میں مزید کم کر کے 14 گھنٹے کیا جائے گا۔