"قربانیاں صرف عوام دے رہے ہیں، حکومت نے کوئی قربانی نہیں دی!"

نیوز ٹوڈے :  سابق وزیر خزانہ مفتاح اسماعیل نے کہا ہے کہ صرف عوام قربانیاں دے رہے ہیں، حکومت نے کوئی قربانی نہیں دی، حکومت اپنے ہی سائے سے خوفزدہ ہے۔مفتاح اسماعیل نے کہا کہ موجودہ حکومت اپنے ہی سائے سے خوفزدہ ہے، سب جانتے ہیں کہ موجودہ حکومت کتنے مینڈیٹ لے کر آئی ہے، یہی وجہ ہے کہ موجودہ حکومت خوف سے کام کر رہی ہے۔

مفتاح اسماعیل نے کہا کہ ہمارے ساتھ کام کرنے والے ٹیکس دیتے ہیں، ہمارے ساتھ جس کی دکان یا زرعی زمین ہے وہ ٹیکس نہیں دیتا، دنیا میں جن کے پاس زیادہ پیسہ ہے وہ زیادہ ٹیکس دیتے ہیں۔سابق وزیر خزانہ نے کہا کہ جن کے پاس اربوں روپے ہیں وہ زیادہ ٹیکس نہیں دیتے، ہمارے ملک میں ادویات پر سیلز ٹیکس لگایا جاتا ہے، سیلز ٹیکس بڑھا دیا جاتا ہے۔

انہوں نے کہا کہ بجٹ کے حوالے سے کہا جا رہا ہے کہ 1200 سے 1500 ارب کا ترقیاتی پروگرام ہو گا، اس وقت اخراجات کم کیے جائیں تاکہ خسارہ کم ہو، حکومت صرف سٹیٹ بنک پر چھوڑ رہی ہے اور یہ سود کی شرح کو بڑھاتا ہے.

مفتاح اسماعیل نے کہا کہ اس وقت این ایف سی میں تبدیلی ضروری تھی، پراپرٹی اور ایگریکلچر ٹیکس وفاق اپنے پاس رکھے، وفاق صوبوں کو پیسے دے رہا ہے اس میں کمی کی جائے۔

ان کا کہنا تھا کہ اسٹیٹ بینک کو بہت پہلے شرح سود میں کمی کردینی چاہیے تھی، اسٹیٹ بینک نے اب شرح سود میں کمی کی ہے جو کہ اچھی بات ہے، مجھے نہیں لگتا کہ سمت بہت درست ہے لیکن کوشش کی جارہی ہے۔

مفتاح اسماعیل نے کہا کہ مسئلہ یہ ہے کہ ہمارے نظام میں سیاستدان عوامی مسائل پر توجہ دینے کے بجائے آپس میں لڑ رہے ہیں، سیاستدانوں کو مل بیٹھ کر عوام کے مسائل حل کرنے چاہئیں۔انہوں نے کہا کہ پیپلز پارٹی اور مسلم لیگ ن اقتدار میں ہیں، مسائل پر توجہ دینا ان کا فرض ہے، فیصلہ ہو یا نہ ہو، بیٹھ کر بات کرنا ضروری ہے۔