شیر افضل مروت کا اہم شخصیت سے استعفی کا مطالبہ

نیوز ٹوڈے :  پاکستان تحریک انصاف کے رہنما  شیر افضل مروت نے شبلی فراز سے پارٹی دفتر اور سینیٹ میں قائد حزب اختلاف کے عہدے دونوں سے مستعفی ہونے کا مطالبہ کردیا۔پی ٹی آئی کے جنرل سیکرٹری عمر ایوب نے جمعرات کو پارٹی عہدے سے استعفیٰ دے دیا ہے اور ان کے استعفے پر ردعمل کا اظہار کرتے ہوئے پی ٹی آئی رہنما شیر افضل مروت نے ان کے فیصلے کا خیر مقدم کیا ہے۔

سوشل میڈیا پلیٹ فارم ایکس پر اپنے بیان میں شیر افضل مروت نے کہا کہ عمر ایوب کے سیکرٹری جنرل کا عہدہ چھوڑنے کے دانشمندانہ فیصلے کا خیرمقدم کرتا ہوں، پارٹی کے اہم عہدوں پر فائز کچھ دیگر افراد نے بھی ان کی پیروی کی۔ 

شیر افضل مروت نے کہا کہ اس کی وجہ یہ ہے کہ پارٹی ایک بھی کام مکمل کرنے میں ناکام رہی ہے، پی ٹی آئی کے بانی جیل میں ہیں اور مینڈیٹ کی بازیابی دور کی بات ہے۔ ہماری خواتین جیلوں میں بند ہیں اور ہم لوگوں کو ایک عظیم تحریک کے لیے متحرک کرنے میں ناکام رہے ہیں۔

انہوں نے کہا کہ بلے کے نشان کا نقصان، مخصوص نشستیں، ضمنی انتخابات اور پارٹی کی تنظیم نو کچھ ایسی مثالیں ہیں جہاں پارٹی قیادت بری طرح ناکام ہوئی۔ان کا مزید کہنا تھا کہ میں شبلی فراز سے عہدوں سے استعفیٰ کا مطالبہ کرتا ہوں۔