فلور ملز کا ملک بھر میں ہڑتال کا اعلان

نیوز ٹوڈے :    لاہور سمیت ملک بھر کی فلور ملز انڈسٹری نے فلور ملز اور ہول سیلرز پر ود ہولڈنگ ٹیکس کے نفاذ کے خلاف 10 جولائی کو ہڑتال کا اعلان کیا ہے۔ذرائع کے مطابق ہڑتال کی صورت میں ملک بھر کی 1500 فلور ملیں بند ہو جائیں گی، پنجاب میں سب سے زیادہ 1100 فلور ملیں، کے پی میں 130 فلور ملیں، سندھ میں 200 فلور ملیں اور بلوچستان میں 70 فلور ملیں ہیں۔ اس صورت میں صوبائی دارالحکومت لاہور میں 100 سے زائد فلور ملیں بھی بند ہو جائیں گی۔ ذرائع کا کہنا ہے کہ اگر آئندہ دو روز میں حکومت سے مذاکرات نہ ہوئے تو فلور ملز کی ہڑتال کی صورت میں آٹا ایک بار پھر مہنگا ہونے کا خدشہ ہے۔ 

مارکیٹ ذرائع نے بتایا ہے کہ محکمہ خوراک پنجاب کے نوٹیفکیشن کے مطابق 10 کلو کے تھیلے کی قیمت 900 روپے ہے جبکہ اکثر مقامات پر 10 کلو آٹے کا تھیلا 930 سے ​​950 روپے میں فروخت ہو رہا ہے۔چیئرمین پاکستان فلور ملز ایسوسی ایشن عاصم رضا نے کہا ہے کہ ٹیکس ختم نہ کیا گیا تو ملک گیر ہڑتال کی جائے گی۔ گندم کی دھلائی بند کر دی جائے گی، 12 جولائی کو گندم پیسنا بند کر دیا جائے گا۔انہوں نے مزید کہا کہ 13 جولائی کو آٹے کی آمدورفت مکمل طور پر بند کر دی جائے گی، 3 دن کا بیک لاگ بن جائے گا اور مارکیٹ متاثر ہو گی۔ آٹا غائب ہو جائے گا۔