مخصوص نشستیں، حکمران اتحاد عدالتی فیصلے پر بحث کا ارادہ نہیں رکھتا

نیوز ٹوڈے :    حکمراں اتحاد عجلت میں قومی اسمبلی اور سینیٹ کے اجلاس بلا کر مخصوص نشستوں کے معاملے میں عدالتی فیصلے پر بحث اور جانچ پڑتال کا ارادہ نہیں رکھتا۔

حکمران اتحاد ہر زاویے سے صورتحال کا جائزہ لے گا جب کہ اتحادی جماعتوں کی قیادت رواں ہفتے مشاورت کرے گی اور فیصلہ کیا جا سکتا ہے۔پاکستان مسلم لیگ (ن) کے صدر میاں نواز شریف کی جانب سے مری میں بلایا گیا اجلاس جو کہ آئندہ ہفتے لاہور میں متوقع ہے، ملتوی کر دیا گیا ہے جس میں ملک کی مجموعی سیاسی صورتحال کا جائزہ لیا جائے گا۔

حکمران اتحاد کے اعلیٰ ذرائع نے اتوار کی شام 'جنگ' کو بتایا کہ قومی اسمبلی یا سینیٹ کا اجلاس پیر 22 جولائی کو یا اس کے بعد بلانے پر غور کیا جا سکتا ہے، بشرطیکہ اس پر اتفاق رائے ہو۔قومی اسمبلی کا اجلاس طے شدہ کیلنڈر کے مطابق 5 اگست کو ہو گا جس میں تعارف اسی صورت میں ہو سکتا ہے جب وزارت قانون، انصاف اور پارلیمانی امور اس طرح کا مسودہ منظوری کے لیے تیار کرے۔

ذرائع نے انکشاف کیا ہے کہ اکثریتی عدالت کے فیصلے پر عملدرآمد میں کئی تکنیکی مسائل ہیں جن میں تحریک انصاف کے انٹرا پارٹی انتخابات کے لیے الیکشن کمیشن کے سرٹیفکیٹ کا اجراء کافی اہمیت کا حامل ہے۔ 

اگر کمیشن تحریک انصاف کے ان انتخابات کو درست تسلیم کرتا ہے اور سرٹیفکیٹ جاری کرتا ہے تو تحریک انصاف کی جانب سے مخصوص نشستوں کے لیے جن اراکین کو نامزد کیا جائے گا وہ حلف اٹھا سکیں گے۔