مفت سولر پینل کب شروع ہوں گے؟

نیوز ٹوڈے :    سندھ کے وزیر توانائی ناصر حسین شاہ نے مفت سولر پینلز کی فراہمی کے حوالے سے عوام کو خوشخبری سنادی۔تفصیلات کے مطابق صوبائی وزیر توانائی سید ناصر حسین شاہ کی زیر صدارت چیئرمین بلاول بھٹو کی ہدایات پر سولر پینلز کے حوالے سے محکمہ توانائی کے اعلیٰ افسران اور این جی اوز کے ساتھ مفت سولر سپلائی کے منصوبے کے حوالے سے اجلاس ہوا۔

جس میں وزیر توانائی کے علاوہ سیکرٹری انرجی مصدق احمد خان، سی ای او (SPHF) خالد شیخ، ڈائریکٹر سندھ سولر انرجی پروجیکٹ محفوظ قاضی اور مختلف این جی اوز کے سربراہان نے شرکت کی۔اجلاس میں عالمی بینک کے تعاون سے سولر پینلز کی فراہمی پر تفصیلی تبادلہ خیال کیا گیا۔اجلاس سے خطاب کرتے ہوئے ناصر شاہ نے کہا کہ سولر پینلز کی فراہمی رواں ماہ اگست میں شروع کر دی جائے گی۔

انہوں نے رواں ماہ اگست میں سولر پینل کی فراہمی کے لیے اقدامات تیز کرنے کی بھی ہدایت کی۔صوبائی وزیر نے کہا کہ چیئرمین بلاول بھٹو کی ہدایت پر منصوبے کی شفافیت کو یقینی بنایا جائے، جلد ہر ڈویژن اور ضلع میں سولر پینلز کی تقسیم کا عمل شروع کریں گے۔

انہوں نے کہا کہ سندھ بھر میں توانائی کے متبادل ذرائع سے عوام مستفید ہوں گے، عوام کو مفت بجلی فراہم کرنے کے لیے مختلف منصوبوں پر کام جاری ہے۔ناصر شاہ نے مزید کہا کہ حکومت سندھ سستی بجلی فراہم کرکے عوام کو ریلیف دینا چاہتی ہے۔ اس کی وجہ سے وہ مشکلات کا شکار ہیں۔