چہلم امام حسین کے موقع پر سیکیورٹی کے سخت انتظامات، کنٹینرز لگا کر جلوسوں کے راستے بند کر دیے گئے

26, اگست , 2024

نیوز ٹوڈے : شہدائے کربلا کا چہلم آج عقیدت و احترام سے منایا جا رہا ہے اور اسی مناسبت سے ملک بھر میں جلوس نکالے جائیں گے۔شہدائے کربلا کے چہلم کے موقع پر مختلف شہروں میں ذوالجناح علم، اور تعزیے بھی برآمد کیے جائیں گے، جلوس کے روٹ پر ٹھنڈے پانی اور شربت کی سبیلیں رکھی گئی ہیں۔

کراچی میں چہلم کے جلوس کے روٹ کو جانے والی سڑکوں اور سڑکوں پر کنٹینرز لگا دیے گئے ہیں۔ نشتر روڈ لسبیلہ چوک سے قابل رسائی ہوگی اور لیاقت آباد سے آنے والی ٹریفک کو تین ہٹی سے لسبیلہ چوک کی طرف موڑ دیا جائے گا۔ اسی طرح شاہراہ قائدین سے نمائش میں جانے والی گاڑیاں کشمیر روڈ سے جا سکیں گی۔

چہلم شہدائے کربلا کے موقع پر سندھ بھر میں موٹر سائیکل کی ڈبل سواری پر بھی پابندی عائد ہے جب کہ کراچی میں چہلم شہدائے کربلا کے جلوس کی سیکیورٹی کے سخت انتظامات کیے گئے ہیں۔ جبکہ جلوسوں کی فضائی نگرانی کی جائے گی۔

سندھ حکومت نے آج شہدائے کربلا کے چہلم پر کراچی، حیدرآباد، لاڑکانہ، سکھر اور خیرپور سمیت سندھ کے بڑے شہروں میں موبائل فون سروس بند کرنے کا اعلان کیا ہے۔