پی ٹی آئی کا احتجاج، آج اسلام آباد اور راولپنڈی میں پرائیویٹ سکولز بند رکھنے کا اعلان

نیوز ٹوڈے :   پی ٹی آئی کے ڈی چوک پر احتجاج کے پیش نظر اسلام آباد اور راولپنڈی میں آج نجی اسکول بند رکھنے کا اعلان کیا گیا ہے۔اسلام آباد پرائیویٹ اسکول ایسوسی ایشن نے سڑکوں کی بندش کے پیش نظر آج اسکول بند رکھنے کا اعلان کیا ہے۔

جنرل سیکرٹری پرائیویٹ سکول ایسوسی ایشن وحید خان کا کہنا ہے کہ بچوں کی حفاظت ہماری اولین ترجیح ہے، کل بھی کنٹینرز کی وجہ سے طلباء کو پریشانی کا سامنا کرنا پڑا۔ دریں اثناء آل پاکستان پرائیویٹ سکولز مینجمنٹ ایسوسی ایشن نارتھ پنجاب کے صدر ابرار احمد نے بھی ایک بیان دیا۔  کہ اسلام آباد میں ممکنہ احتجاج کے پیش نظر آج راولپنڈی شہر کے تعلیمی ادارے بند رہیں گے۔ ابرار احمد کے مطابق تعلیمی ادارے بند کرنے کا فیصلہ سڑکوں کی بندش کے باعث کیا گیا ہے۔

 دوسری جانب ترجمان اسلام آباد پولیس کا کہنا ہے کہ اسلام آباد پولیس کے تمام سہولیاتی مراکز اور ڈرائیونگ لائسنس دفاتر آج بند رہیں گے۔ میٹرو بس انتظامیہ نے اعلان کیا ہے کہ راولپنڈی میں آج میٹرو بس سروس معطل رہے گی۔

 میٹرو بس انتظامیہ کے مطابق ضلعی انتظامیہ کی ہدایت پر میٹرو بس سروس بدستور معطل رہے گی، صدر سے آئی جے پی روڈ تک بس سروس بدستور معطل رہے گی، آئی جے پی روڈ سے پاک سیکرٹریٹ تک میٹرو بس کو بحال کیا جائے گا۔

ضلعی انتظامیہ کی ہدایت پر فیض آباد کی بندش شروع کردی گئی۔ مری روڈ سمیت اسلام آباد ایکسپریس وے کو بھی بند کیا جا رہا ہے، سڑکیں بلاک کرنے کے لیے بھاری مشینری فیض آباد اور ایکسپریس وے پر لائی گئی ہے۔

فیض آباد اور ہائی وے ایکسپریس وے پر کنٹینرز کو ڈبل لیئر میں رکھا جا رہا ہے۔ذرائع کے مطابق راولپنڈی میں سیکیورٹی ہائی الرٹ 4 ہزار اہلکار اور افسران تعینات ہوں گے۔