پاکستان نے باضابطہ طور پر آئی ایم ایف سے ایک ارب ڈالر کی فنڈنگ ​​کی درخواست کر دی

نیوز ٹوڈے :   پاکستان نے بین الاقوامی مالیاتی فنڈ (آئی ایم ایف) سے ایک ارب ڈالر کی فنڈنگ ​​کے لیے باضابطہ درخواست کی ہے۔

مغربی خبر رساں ایجنسی کو انٹرویو دیتے ہوئے وزیر خزانہ محمد اورنگزیب نے کہا کہ ہم نے آئی ایم ایف سے ایک ارب ڈالر کی فنڈنگ ​​کی باضابطہ درخواست کی ہے۔ وزیر خزانہ واشنگٹن میں مختلف مالیاتی اداروں اور ممالک کے رہنماؤں سے ملاقاتیں کر رہے ہیں۔

وزیر خزانہ نے جے پی مورگن بینک کے نمائندوں سے بھی ملاقات کی، ملاقات میں وزیر خزانہ محمد اورنگزیب نے اسٹینڈ بائی انتظامات کے بعد پاکستان کی معاشی صورتحال میں بہتری کا جائزہ لیا۔

وزیر خزانہ نے آئی ایم ایف کے ای ایف ایف پروگرام کی اہمیت پر زور دیا اور پانڈا بانڈ کے ذریعے عالمی کیپٹل مارکیٹ تک رسائی کے عزم کا اظہار کیا۔ وزیر خزانہ نے اسلامی ترقیاتی بینک (IDB) کے نمائندوں سے بھی ملاقات کی۔ تعلیم، صحت اور دیگر شعبوں میں مالی تعاون اور مہمند ڈیم میں IDB اور عرب کوآرڈینیشن گروپ کی سرمایہ کاری کو سراہا۔

وفاقی وزیر خزانہ جو امریکہ میں ہیں نے یو ایس پاکستان بزنس کونسل کی قیادت سے بھی ملاقات کی، ملاقات میں انہوں نے بزنس کونسل کی قیادت اور سرمایہ کاروں کو خصوصی سرمایہ کاری کی جانب سے فراہم کردہ ون ونڈو سہولت سے مستفید ہونے کی دعوت دی۔ 

واضح رہے کہ وفاقی وزیر خزانہ محمد اورنگزیب واشنگٹن میں ورلڈ بینک اور آئی ایم ایف کے سالانہ اجلاسوں میں شرکت کے لیے وفد کے ہمراہ امریکا میں ہیں۔