جنوبی غزہ میں حماس لڑاکوں کےساتھ جھڑپوں میں 2 صیہونی فوجی ہلاک

نیوز ٹوڈے :   جنوبی غزہ میں حماس کے لڑاکوں کے ساتھ آمنے سامنے کی لڑائی میں 2 صیہونی فوجی ہلاک ہو گۓ - صیہونی فوج نے اس خبر کی تصدیق کرتے ہوۓ بتایا کہ ہلاک ہونےوالے دونوں فوجی (گیواتی بریگیڈ کی شیکڈ بٹالین) سے تعلق رکھتے تھے - اسرائیل کے میڈیا کی دی گئی رپورٹ کے مطابق ہلاک ہونے والے فوجیوں کا ایک ساتھی شدید زخمی بھی ہوا ہے - صیہونی فوج کے دیے گۓ بیان کے مطابق پچھلے ایک سال سے جاری غزہ جنگ میںصیہونی فوج کے مجموعی طور پر 780 اہلکار ہلاک ہو چکے ہیں - اسرائیلی میڈیا کا کہنا ہے کہ اسرائیل میں ہونے والے جانی نقصان کے حوالے سے جاری سال میں اکتوبر کا مہینہ سب سے زیادہ خطرناک رہا ہے -

اسرائیل کے  میڈیا کے مطابق جنوبی لبنان میں جاری زمینی آپریشن میں پچھلے ایک مہینے میں 37 اسرائیلی فوجی ہلاک ہو چکے ہیں - جبکہ غزہ میں فلسطینی لڑاکوں کے ساتھ لڑائی میں 19 صیہونی فوجی ہلاک ہوۓ ہیں -اور ایک اسرائیلی فوجی حادثے کا شکار بھی ہوا ہے ـ میڈیا کے مطابق اسرائیل پر حماس کے لڑاکوں کے حملوں میں 9 اسرائیلی شہری جبکہ 2 پولیس اہلکار ہلاک ہوۓ ہیں - رپورٹ کے مطابق اکتوبر کے مہینے میں غزہ اور لبنان جنگ میں اسرائیلی شہریوں ، فوج اور پولیس اہلکاروں کے ہلاک ہونے کی تعداد 88 ہو چکی ہے -