صدارتی انتخابات میں جیت کے بعد ٹرمپ کا خطاب ڈونلڈ ٹرمپ نے ایلون مسک کے حوالے سے کیا کہا؟

06, نومبر , 2024

نیوز ٹوڈے : امریکی صدارتی انتخابات میں کامیابی کے بعد ڈونلڈ ٹرمپ نے ایلون مسک کو ریپبلکن پارٹی کا 'نیا اسٹار' قرار دیا ہے۔ٹیسلا اور اسپیس ایکس جیسی کمپنیوں کے مالک دنیا کے امیر ترین شخص ایلون مسک نے 2024 کے امریکی صدارتی انتخابات کے دوران ڈونلڈ ٹرمپ کی حمایت میں بھرپور مہم چلائی۔
دوسری بار امریکی صدر منتخب ہونے کے بعد فلوریڈا میں خطاب کرتے ہوئے ڈونلڈ ٹرمپ نے بتایا کہ کس طرح انہوں نے اسپیس ایکس راکٹ کی ویڈیو دیکھتے ہوئے ایلون مسک کو ایک گھنٹے تک پکڑے رکھا۔
انہوں نے ایلون مسک کو ایک حیرت انگیز شخص قرار دیا اور ریپبلکن پارٹی میں ان کے بڑھتے ہوئے اثر و رسوخ کو اجاگر کیا۔
ایلون مسک نے سوئنگ ریاستوں میں ڈونلڈ ٹرمپ کے لیے مہم چلائی۔ اس نے ڈونلڈ ٹرمپ کی پولیٹیکل ایکشن کمیٹی کو 750 ملین ڈالر کی مالی اعانت فراہم کی تاکہ انہیں وائٹ ہاؤس واپس لایا جا سکے۔
اسی طرح انہوں نے اپنے سوشل میڈیا پلیٹ فارم X (Twitter) پر ڈونلڈ ٹرمپ کی میزبانی کی جبکہ ان کے ساتھ کچھ سیاسی ریلیوں میں بھی شرکت کی۔
امریکا کے 47ویں صدر منتخب ہونے کے بعد ڈونلڈ ٹرمپ نے اپنی تقریر میں کہا کہ وہ (ایلون مسک) کردار کے حامل شخص ہیں، وہ ایک خاص شخص ہیں، وہ بہت ذہین ہیں، ہمیں اپنے ذہین لوگوں کی حفاظت کرنی ہے۔ کیونکہ اب ان کی تعداد زیادہ نہیں ہے۔
انتخابی مہم کے دوران ڈونلڈ ٹرمپ نے عندیہ دیا تھا کہ اگر وہ دوبارہ منتخب ہوتے ہیں تو وہ ایلون مسک کو اپنی کابینہ میں جگہ دے سکتے ہیں یا انہیں مشیر بنا سکتے ہیں۔
واضح رہے کہ امریکی صدر کے انتخاب کے لیے تمام 50 ریاستوں میں ہونے والی پولنگ کے نتائج کے مطابق ڈونلڈ ٹرمپ نے انتخاب جیت لیا ہے اور وہ امریکا کے 47ویں صدر بن گئے ہیں۔